Аз ҷониби доктори илмҳои педагогӣ, профессор, ректори Донишкадаи давлатии тарбияи ҷисмонии Тоҷикистон ба номи С. Раҳимов Шодӣ Сафаров ва мушовири ректори донишкадаи мазкур дотсент Мирзобоқӣ Шарифов чанде пеш китоби дарсии “Фалсафаи варзиш” таълиф гашт, ки он дар баёни густариш, болоравии аҳамияти иҷтимоии варзиш, бо такя ба амалия ва назарияи варзиши муосир ҳамчун ҷузъи пураҳамияти низоми арзишҳои фарҳангии халқҳову миллатҳо нахустин таҷриба аст. Дар китоби мазкур маротибаи аввал варзиш, аҳамият ва моҳияти назарияи фалсафаи варзиш шарҳи муфассал ёфта, паҳлӯҳои арзишманди он аз ҷониби муҳаққиқони соҳа таҳқиқ шудааст.

Китоб дар асоси сарчашмаву адабиёти мавҷудаи фалсафӣ, варзишӣ, таърихӣ, фарҳангшиносӣ, тиббии олимони варзида, маълумоти оморӣ, истифодаи таҷрибаи илмию омӯзгории муаллифону ҳамкасбон, маслиҳату пешниҳоди мутахассисон ба табъ расида, толибилмонро бо назарияи фалсафаи варзиш, таърихи пайдоиш, инкишоф, ташаккул, давраҳою марҳилаҳои асосии фалсафаю фарҳанги варзишпарварии халқи тоҷик ва тарбияи инсони солим аз наздик шинос менамояд. Китоби мазкур ҳамчунин барои инкишофи варзиш ва ҷалби омма барои ширкати фаъолона дар ташаккул, таҳкиму таблиғи тарзи ҳаёти солим мусоидат мекунад.

Ин асар, ҳамчун мужда дар соҳаи илми варзиши Тоҷикистон, манбаи комили иттилоотию таҳлилӣ барои доираи фаррохи хонандагон, донишҷӯёну устодон, кормандони соҳаи варзиши мамлакат, муаррихону муҳаққиқон ва алоқамандони варзиш пешбинӣ шудааст.

Мавлон ШАРИФОВ, и.в.дотсенти ДДТҶТ ба номи С. Раҳимов