Ҷавоне тасмим гирифт, ки дар ширкати машҳури “Microsoft” ба ҳайси фаррош ба кор дарояд. Дар шуъбаи кадрҳо баъди суолу ҷавоб ва санҷиш, оқибат, чунин хабари хуш расониданд:

- Табрик мекунем, шумо ба кор қабул шудед. Суроғаи почтаи электронӣ (e-mail)- и худро диҳед, то мо шуморо аз реҷаи коратон огаҳ созем.

- Ман ақаллан компютер надорам, - иқрор шуд ҷавон, - чӣ ҳоҷат ба “e-mail”?

- Ин тавр бошад, мутаассифона, мо шуморо ба кор қабул карда наметавонем. Чун дар ширкати мо шарти асосӣ ин алоқаи фаврии байни кормандон тавассути “e-mail” мебошад ва кори мо бе он самараи хуб дода наметавонад.

Чӣ илоҷ? Ҷавон рафту чанд муддат андеша кард, ки чӣ гуна тавассути компютер маблағ пайдо кардан мумкин аст. Дар ҷайбаш 30 доллар дошт. Бо он пул аз як дӯкон 10 кг себ харида, ба кӯчаи сер-одам баромад ва ба фурӯши маҳсулоти “болаззату серғизо ва аз ҷиҳати экологӣ тоза” машғул шуд. Баъди якчанд соат, маблағи ӯ 2 маротиба ва баъди 6 соат бошад, 10 маротиба зиёд шуд. Ва ҷавон дарк кард, ки бо чунин тарзи кор метавон бе фаъолият дар ягон ширкат ва бе корфармо низ зиндагиро пеш бурд.

Аз байн чанд муддат сипарӣ гардид. Ҷавон мошин харида, нахуст соҳиби дӯкони хурдакак, сипас, мағоза ва баъди 5 сол аллакай соҳиби як шабакаи бузурги марказҳои савдо шуд. Ва рӯзе ӯ барои суғуртаи молу амвол ва тиҷорати худ ба ширкати суғуртавие омад ва корманди ширкат барои пешниҳодоти манфиатнок аз ӯ “e-mail” пурсид. Тоҷири ҷавон чун чанд соли қабл дар ҷавоб гуфт, ки на компютер дораду на “e-mail”.

- Хеле ҳайратовар аст!- бо тааҷҷуб гуфт корманди ширкат. – Соҳиби чунин тиҷорати бузург ҳатто компютери шахсӣ надорад! Агар шумо компютер медоштед, боз ба кадом мартабаҳое мерасидед?

- Агар ман компютер медоштам, ҳоло фарроши ширкати “Microsoft” будам, - гуфт дар ҷавоб тоҷир.

PS: Агар шумо чизе надоред, шояд ба он хотир аст, ки он ба шумо даркор нест.