КИТОБХОНА
Панҷшанбе 18 Июл 2019 02:13
6161
22 июн дар боғи устод Рӯдакии шаҳри Душанбе дар арафаи ҷашни Ваҳдати миллӣ, лотереяи бурдноки молӣ таҳти унвони “Китоб – манбаи дониш” ҷамъбаст гардида, ба нафарони фаъол ва ғолиби лоторея туҳфаҳо супорида шуд.

Иқдоми мазкур ҷиҳати иҷрои дастури Пешвои миллат муҳтарам Эмомалӣ Раҳмон, аз ҷумла, бо ташаббуси Сарвари давлат баргузор гардидани озмуни ҷумҳуриявии “Фурӯғи субҳи доноӣ…” ва соли 2019 дар қаламрави Иттиҳоди Давлатҳои Мустақил эълон гардидани Соли китоб роҳандозӣ карда шуда, ҳадаф аз он талқин намудани китобхонӣ миёни хонандагону донишҷӯёни ҳамаи зинаҳои таҳсилот ва намояндагони касбу кори гуногун мебошад.

Тавре Давлат Сафар, директори Муассисаи нашриявии “Адиб” иброз дошт, миллати сарбаланди тоҷик ба китобдорию китобхонӣ аз қадимулайём арҷ мегузошт ва қаламу дафтару девонро ҳамчун гавҳараки чашм эҳтиёт мекард. Тоҷикон онро беҳтарин ҳамнишину ҳамроз, сарчашмаи ақлу хирад, омӯзгори беминнат, “аниси кунҷи танҳоӣ” ва “фурӯғи субҳи доноӣ” медонанд. Воқеан, таърихи китобдории миллати мо аз таърихи китобхонаҳои кишварҳои дигар қадимтар аст, ки имрӯз аз назари китобдорӣ авҷу камол ёфтааст.
 
“Иқдоми мазкурро ба хотири ташвиқу тарғиб ва оммавигардонии мутолиаи китоб роҳандозӣ намудем. Тибқи он ҳар нафаре, ки китоб харидорӣ менамояд, соҳиби лоторея мегардад. Инчунин, шахсон ва идораҳое, ки бештар аз ҳама китоб харидорӣ мекунанд, бо мукофоти алоҳидаи пулӣ сарфароз хоҳанд шуд”,- иттилоъ дод Давлат Сафар.

Ба зикри номбурда, дар ин муддате ки ин иқдом ҷараён дошт, дар он 60 номгӯи адабиёти гуногужанр бо теъдоди 90 ҳазор чоп карда шуда, аз рӯзи аввали баргузории намоиш-фурӯш то имрӯз зиёда аз 100 ҳазор китоб ба фурӯш рафтааст. Ин аз он далолат мекунад, ки мардуми тоҷик ҳавасмандии худро нисбат ба китобу китобдорӣ тақвият медиҳанд. Китобҳои пешниҳодгардида ҳамагӣ аз ҷиҳати маъно пурмазмун буда, сифати баланду нархи дастрасро доро мебошанд.

 Мо тасмим дорем, ки ин иқдомро дар оянда боз ҳам такмил дода, дар ҳама иду ҷашнҳои кишвар баргузор намоем, - иброз дошт Давлат Сафар.

Ҷамъбасти чорабинии мазкур дар фазои тантанавӣ доир гардида, дар он  ҳунармандони маҳбуби кишвар бо ҳунарнамоии худ чорабиниро рангин намуданд. Сипас масъулини Вазорати фарҳанг ва Муассисаи нашриявии “Адиб” ба ғолибон туҳфаҳо, аз қабили телефонҳои мобилӣ, ноутбукҳо, телевизор ва шоҳҷоиза-10 ҳазор сомонӣ тақдим карданд. Ҳамчунин як қатор намояндагони фаъоли вазорату идораҳои кишвар бо сипоснома ва туҳфаҳо қадрдонӣ карда шуданд. 

Лозим ба ёдоварист, ки ташаббускорони ин иқдоми Муассисаи нашриявии “Адиб” ба шумор рафта,  ин намоиш дар мувофиқа бо Вазорати фарҳанг ва Вазорати молия тули шаш ҳафта, аз 11 май то 22 июн ҳар ҳафта рӯзҳои шанбе аз соати 9:00 то 13:00 дар боғи устод Рӯдакӣ сурат мегирифт.

02.jpg

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Июл 2019 c.