Бо дастгирии бевоситаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон маҷмуаи шеърҳои шоир Нуруллҳои Ориф таҳти унвони “Офтоби чеҳрахандон” ба нашр расид.

Шоири шинохта ва ҳамзамон корманди рӯзномаи «Ҷавонони Тоҷикистон» Нуруллоҳи Ориф дар маҷмуаи мазкур шеърҳои ба фаъолияти пурсамари Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бахшидаашро гирд оварда, дар онҳо сухан аз ободонию навсозиҳо ва кӯшишҳои инсонпарваронаи ин марди шарифро ба қалам додааст. Дар ҳар мисраи абёти гирдовардашуда, метавон меҳру ихлоси гӯяндаи ашъорро ба Пешвои миллат ба хубӣ эҳсос кард.

Хонандагони каломи бадеъ, махсусан дӯстдорони шеъри муосир дар маҷмуаи мазкур 49 шеъри шоири ширинкаломи мо-Нуруллоҳи Орифро, ки бо сабки хос ва равону сода ҳастанд, метавонанд мутолиа кунанд.
Аз ҷумлаи шеърҳое, ки ба Пешвои миллат бахшида шудаанд, метавон инҳоро мисол овард: “Эй Пешво”, “Пешвои миллат”, “Бобои Эмомалӣ”, «Паёми Пешво» ва ғайраҳо.

Муаллиф ҳамчунин дар маҷмуааш аз ободиву созандагии кишвари маҳбубамон шукргузорӣ карда, дар як мисраи манзумаш чунин меорад:

Шукри Истиқлолу сарвар мекунем,
Шукри ободии кишвар мекунем.
Шукри он зоте, ки моро ҳаст кард,
Шукри бому хонаву дар мекунем.