КИТОБХОНА
Ҷумъа 18 Сентябр 2020 01:58
6982
- Хушхабар! - ба садои хушҳолонаи Файзалӣ аъзои даста сӯяш гардан тофтанд. - Дӯстамон полковникро ба шаҳри Кӯлоб таъҷилан даъват намуд. Дар ихтиёрамон ду соат вақт. Дар ин муддат мо бояд коргоҳро тарк намоем. Амалиётро мутобиқи нақша роҳандозӣ менамоем. Карим маҳсулотро ба халта андохта, бо латтаи равғанолуд печонед. Маҳмуд вазифаат маълум?

- Ҳа, маълум, - Маҳмуд ба сари Ҷаъфар як литр хуни тайёркардаашро рехта, бо латтаи сурх баст.

- Офарин! - сардор дарҳол ба таҳсин лаб кушод ва паҳлуи “маҷруҳ” рост шуд. - Каме тоқат бикун. Баъд кайфу сафо мекунем.

Сипас рӯй тарафи узви дигари даста гардонд:

- Гурез ҳаял накун. Медонам, хеле сустрафтор ва танбалӣ. Зуд картерро кушою маҳсулотро он ҷо пинҳон бикун. Баъди бист дақиқа мошинро аз истгоҳ барору ҷониби дарвоза бирон.

- Аз посбон чӣ тавр халос мешавем? - Сафол пеши сухани Файзалиро бурид.

- Ба гап даровардани Акрам вазифаи ман, - сардор ба сӯи дарвоза гом бардошт, - Ҳамин ки бо даст ишора кардам зуд ба сӯи дарвоза шитобед. То омадани полковник мо бояд аз дидбонгоҳи Шаршара гузарем.

- Эээ, Ҷаъфарро чӣ бало зад? - Акрам даст сӯи тиреза дароз кард.

- Порасанги бузург аз девор канда шуда, болои сараш афтид, - Файзалӣ маҳзунона овоз баровард, - Ӯро таъҷилан ба беморхонаи Қарияи боло бурданамон лозим.

- Э, бечорае, - дилсӯзӣ намуд посбон ва барои дидани бемор аз ҳуҷра берун баромаданӣ шуд, - Чаро ба беморхонаи шаҳри Кӯлоб намебаред?

- Чӣ, ба гапи ман бовар намекунед? - Файзалӣ пеши роҳи посбонро баст, - Ҷарроҳону табибони беҳтарин дар касалхонаҳои пойтахтанд.

- Акаи Файзалӣ ба шумо бовар накунам, ба кӣ бовар кунам? Маҳз бо тавсияи шумо маро ба корхонаи тиллобарории Шугнов ба кор қабул карданд, - Акрам ба ҷояш нишаст, - Некии шуморо ҳеҷ гоҳ фаромӯш намекунам.

- Ин тавр бошад, - Файзалӣ донист, ки посбон ба даст афтид, - дарвозаро кушоед, то ки беморро зуд ба шаҳр барем.

- Маҳсулот чӣ мешавад? - посбон даст ба сӯи тугмаи сиёҳ бурд.

- Кадом маҳсулот? - Файзалӣ худро ҳайратзада нишон дод.

- Баъди ин ҳодисаи нохуш мо бо Ҷаъфар овора будем, то ки ӯро ба ҳуш орем. Талошҳоямон бефоида анҷомид. Барои ҳамин шитоб дорем, то ки ҷавонмардро наҷот диҳем. Ана, мошин ҳам баромад. Моро маҳтал накунонед. Боз ба марги Ҷаъфар зомин нашавед.

- Набошад зудтар ба роҳ бароед, - гуфта Акрам тугмаи кушодани дарвозаро зер кард.

- Бригада кор карда истодааст? - Мустафоев аз мошин фаромада ба Акрами дар пешаш рост истода савол дод.

- Не, - посух дод посбон ва ба шарҳи ҳол гузашт. - Порасанг болои сари Ҷаъфар афтидааст. Файзалӣ ӯро бо мошинаш ба беморхонаи Қарияи боло бурд.

- Шумо беморро аз назар гузарондед? - полковник ба рӯйи ҷавон нобоварона нигарист, - Сараш кафида буд? Изи ҷароҳат вуҷуд дошт? Хун рехтагӣ буд? Дигар аъзои бригада куҷост?

- Не, надидам, - Акрам акнун хатои худро фаҳмид, - Ба Файзалӣ бовар кардам. Ӯ зарфшӯёнро бо худ гирифта бурд.

- Чӣ қадар вақт гузашт? - Мустафоев чизеро пай бурда бошад, ки ба сӯи телефон давид, - Рақами қайди давлатии мошинро зуд ба ман бигӯед, - ва гӯшаки телефонро чанг зада бардошт.

Акрам ба коғази зардшудаи ба девор часпонида дида дӯхт ва бо ангушт рақами мошинро ба кофтан даромад.

- Ним соат гузашт, рақами қайди мошин 56 - 24 КЮИ, - ҳадаҳа посух гардонд посбон ва илова кард, - Жигулии сафеди тамғаи 06.

- Дидбонгоҳи Шаршара! - овози марғуладори полковник ҳуҷраи посбонро пур кард, - Ман Мустафоев! Аз кони тилои Шугнов занг мезанам! Мошини сафеди рақами қайди давлатиаш 56 - 24 КЮИ - ро то расида омадани ман нигоҳ доред!

Офтоби моҳи саратон нурҳои гарми тоқатфарсои худро болои дидбонгоҳи Шаршара бераҳмона мепошид. Файзалию аъзои дастааш зери арақ монда, ба мошинро аз назар гузаронидани Мустафоев бе тавофут менигаристанд.

- Рафиқ полковник! Кофтукови шумо зиёда аз се соат боз давом дорад, - Файзалӣ дид, ки ин дафъа Мустафоев бордони мошинро кушод, - Ягон ҷойи ободи мошин намонд. Беҳуда аз мо гумонбар мешавед. Бригадаи ман дар ин корхона бист сол боз бе нуқсон фаъолият дорад. Наход ба мо бовар накунед?

- Бовар мекунам, - Мустафоев бо остини куртааш донаҳои арақи дар пешонаи васеъ пайдошударо пок намуд, - Ҳамон бовариамро месанҷам.

- Дар таги офтоби тафсон сӯхтем, - Файзалӣ хост, ки ба дили полковник раҳм оварад, - Аҳволи бемор торафт вазнин шуда истодааст. Агар ҳодисае шавад, гуноҳаш ба гардани шумост.

- Муҳтарам сардори бригада, сари маро бо сафсатахонӣ гаранг накунед, - полковник сарпӯши муҳаррикро бардошт ва ба гирду атрофи он чашм давонд, - Далели шайъӣ кофта истодаам. Шумо гурги борондида, онро хеле моҳирона ва устокорона дар дохили мошин пинҳон кардаед.

- Гуфтам-ку, - ин дафъа овози Файзалӣ баландтару боҷуръат садо дод, - Мо ҳеҷ гуна тилло - пилло надуздидаем. Либосҳоро кашида, тамоми баданамонро аз назар гузарондед. Порае аз зар пайдо нашуд. Боз чӣ?

- Ҳоло ин кам аст, - Мустафоев сар аз болои муҳаррик бардошт, - Ҳамаатонро аз нури рентгенӣ мегузаронам. Беҳтараш гапа бисёр накунеду чархҳои мошинро кушоед.

- Инаш барои чӣ? - Файзалӣ бо дили нохоҳам қомат рост кард.

- Баллонҳоро аз назар мегузаронам, - полковник калиди мурваткушоиро ҷониби сардори бригада партофт.

Чор нафар аз ҷой бархостанд ва лаҳзае пас таги обу арақ монда, чор чархи мошинро кушоданд. Аз дохили баллонҳо ҳам ҳеҷ чиз ёфт нашуд. Файзалӣ тантана дошт. Ин кӯшиши афсар ҳам бе натиҷа анҷомид. Милисаҳои дар ағба қарордошта низ бо тааҷҷуб ба ҳамкасби худ менигаристанд, ки ин дафъа ӯ ба кадом иқдом даст мезада бошад.

Мустафоев бо сари хам гирди мошин чарх мезад ва ба худ савол медод: наход тахмини ман хато бошад? Боз куҷойи мошинро кобам? Гиреҳи муаммо дар куҷо бошад? Махфигоҳ дар куҷо ҷойгир аст? Курсиҳоро ба берун бароварда, болопӯшашонро даррондам? Ҷилпӯши дохили мошинро кушодам. Оби радиаторро рехтам. Аккумуляторро низ аз назар гузаронидам.

Полковник атрофи мошин беист давр мезад. Нигоҳҳои ҳайратзадаи милисаҳо ва тамасхӯромези гумонбаронро пайхас намекард. Аз қисми пеши мошин гузашта, нохост аз қадамзанӣ боз истод. Картер! Охирин кӯшиш! Картерро бояд кушод!

- Дилатон аз санг будааст, - ба гила гузашт Файзалӣ, - Бо гумони бад моро дар офтоби тафсон месӯзонед. Ҳатто ба бемор дилатон насӯхт. Агар ҳодисае шавад ҷавоб медиҳед. Гуфтам ва боз мегӯям, ки мо гуноҳ надорем. Тиллоро кӣ дуздаду аз мо ҷинояткор метарошед? Шаш соат аст, ки аз дасти шумо дар азобем. Ба СеКа ва прокурор шикоят мебарам.

Суханони таҳдидомези сардори бригада ба гӯши полковник намедаромад. Ӯ бо шаст тоб хӯрда, ба сӯи Файзалӣ дасташро чун шоф рост кард.

- Мошинро ба тартиб дароред!

Гурӯҳ гумон кард, ки ҷустуҷӯ поён ёфт. Дар як лаҳза мошинро ба шакли пештара оварданд. Ҳама шоду мамнун. Ҳатто маҷрӯҳ низ ба ҳаракат даромада, нимхез шуд. Файзалӣ ба сари фармон гузашт ва дигаронро барои нишастан даъват намуд.

- Мошинро ба хандақи таъмирӣ баред, - амр кард Мустафоев ва илова кард, - картерро мекушоем.

Аз дохили равған латтапораро бо ним кило зар баромадан замон Файзалӣ ихтиёран ҳар ду дасташро барои ишкел задан ҷониби Мустафоев дароз кард.

- Пурсабрӣ, савқи табиӣ ва таҷрибаи касбиатон сабаб гардид, ки ҷинояткорон ба мақсади нопоки худ нарасиданд, - директори корхона миннатдорона дасти пурқуввати полковникро самимона фишурд.

- Вазифаамро иҷро мекунам, - софдилона посух дод Мустафоев.

 Зариф ҒУЛОМ

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Сентябр 2020 c.