Талқиндиҳанда ба қуллаи созандагиҳо

“Карлос аз кӯдакӣ сабақҳои нахустини худро доир ба беҳдошти ҳаёт ва усулҳои боло бурдани сатҳи зиндагӣ омӯхта буд. Падар ба ҳар як фарзандаш як дафтар медод, то онҳо даромаду баромад ва фоидаву зарари ҳамарӯзаи худро дар он қайд кунанд. Сипас онҳо якҷоя ин қайдҳоро мехонданд ва ҳолати ҳар як нафарро таҳлил менамуданд. Ба шарофати ин қоидаи муқаррарӣ кӯдакон идора кардани пулҳои худро омӯхтаанд...”.

Аз китоби “Роҳ ба сӯи муваффақият”

Моро орзуҳо ҳаст бешумор. Моро хоҳиш аст зиндагии пурбор. Моро майл танҳо ба шоистарӯзгор. Аммо роҳи расидан ба онҳо нест ҳамвор. Ин аст, ки гоҳе зиндагӣ пурхатар месозад онро. Гоҳи дигар дур медозад моро аз ин роҳ. Дигар мо меҳаросем аз идомаи он. Даргир мешавем бо доштаҳоямон. Меҷангем бо вуҷудамон. Машкук мешавем ба тавоноиямон. Қарор мегирем дар гардишҳо. Меҷӯем самти комёбиро ва чӣ қудрат аст пайдоиш он.

Зиндагии чунин кашшофони роҳи муваффақият ҳамеша ҷолиб буду ҳаст. Онҳо метавонанд моро роҳнамо бошанду роҳкушо. Рӯҳия бубахшанду эътимод. Таконбахшанда бошанду таҳрикдиҳанда.

Чанде пеш китобе ба нашр расид, аз ҷониби рӯзноманигор Шаҳло Эшонова ки метавонад бошад чунин омӯзонанда. Ном аст онро “Роҳ ба сӯи муваффақият”. Фаро мегирад маҷмӯи мақолаҳои нашршуда дар солҳои мухталифу дар матбуоти даврӣ. Дар бар мегирад рӯзгори ашхоси муваффақу сарбаланди мамолики дунёро. Мегӯяд аз ҳадафгузории онҳо. Аз устувории онҳо. Аз муборизаи онҳо бар муқобили нокомиҳо. Аз ҷангидани онҳо бар зидди номуродиҳо. Аз расидани онҳо ба комёбиҳо. Дарҷ шуда он ҷо асрори муваффақияти Бил Гейтс - сарватмандтарин шахси олам, сабки худсозии Карлос Слим, шакли “тиҷорати мардона”-и У.Ятсзюн зани сарватмандтарин, ба аввалинмақоми Болливуд расидани Амитабҳ Баччан, ғалабаи роҳбари яке аз ширкатҳои бузурги ҷаҳон Ларри Эллисон дар набарди заифию устуворӣ, салтанати шоҳи саҳнаи тоҷик Ҳошим Гадо дар мулки ҳунар ва дигар ашхоси комёбу номвар. Дар маҷмӯъ ин китоб мекушояд рози муваффақияти 41 намунанафар.

Муаллиф умедвор аст, ки ин китоб метавонад талқиндиҳандаи хубе бошад, барои заҳматталабӣ ва дур кардани танбалӣ, барои худсозии насли наврасу ҷавон. Мо низ умедворем ба ин. Умедворем “Роҳ ба сӯи муваффақият” бубарад хонандаи худро то қуллаи созандагиҳо.