Ҳаёти имрӯзаро бидуни технологияҳои рақамӣ тасаввур кардан номумкин аст, зеро техникаву таҷҳизоти замонавӣ дар ҳама соҳаҳои ҳаёт ба назар мерасад. Вале мавҷудияти технология ҳоло маънои онро надорад, ки мо истифодаи дурусти онро медонем.

Бинобар ин ба роҳнамову дастурҳое зарурат пайдо мешавад, ки усули истифодаи таҷҳизоти муосирро ба мо ёд диҳад.  Албатта, дар ин самт муҳаққиқон ва мутахассисон кор карда истодаанд, то истифодабарандагони технология душворӣ накашанд. Чунончи чанде пеш китоби таълимии устодони Кафедраи телевизион ва радиошунавонии факултети жуналистикаи Донишгоҳи миллии Тоҷикикстон Дӯстмурод Бобоев ва Саъдулло Ҳайдаров бо номи “Техника ва технологияи воситаҳои электронии ахбор” тариқи нашриёти “Пойтахт” аз чоп баромад. Китоб дар шакли хеле равон ва содда барои донишҷӯён ва журналистони оянда пешниҳод шуда, фарогири мавзӯҳо доир ба техникаву технологияи иттилоотӣ, аз ҷумла пайдоиши техникаи радио, таъсиррасонии он ба ҷаҳонишавӣ, раванди техникикунонии журналистикаи радио, телевизион ва интернет мебошад.

Муаллифон аз ҷумла таъкид мекунанд, ки: “Студияи радио ҳуҷраи махсусест, ки дар он пахши барномаҳо амалӣ карда мешаванд. Ин ҳуҷра бояд ба як қатор талаботи коркарди аксустикӣ, яъне шунавонидани софи садо ҷавобгӯ бошад, савияи пасти шавқунро аз манбаъҳои беруна таъмин намояд ва майдони садои бомаромро дар ҳуҷра ба вуҷуд орад...”

Умед дорем, ки навроҳони фаъолияти журналистикаи электронӣ аз тавсияҳои устодон самаранок истифода мебаранд.

Хуршед МАВЛОН, "ҶТ"