3-10 май дар вилояти Суғд конфронсияи илмии олимони ҷавон доир гардид.

Донишҷӯёни муассисаҳои таҳсилоти олии вилоят дар бахшҳои ҷамъиятшиносӣ, иқтисодиёт, гуманитарӣ ва дақиқ бо маърӯзаҳои илмӣ баромад карданд.

Тавре Мадина Ҳомидова, муовини сардори Раёсати ҷавонон, варзиш ва сайёҳии вилоят иттилоъ дод, 80 маърӯзаи илмии олимони ҷавон ба конфронс пешниҳод гардида, 30 маърӯзаи беҳтарин дар маҷмӯаи алоҳида ба нашр расонида шуд.

- Мақсад аз баргузории конфронс рушди илм, муайян намудани сатҳи дониши олимони ҷавон ва дастгирии онҳо дар корҳои илмӣ-тадқиқотӣ мебошад, - гуфт Зариф Мирдадо, сардори Раёсати ҷавонон, варзиш ва сайёҳии вилоят.

Дар ҷамъбаст аз тарафи Раёсати ҷавонон, варзиш ва сайёҳии вилояти Суғд ба олимони ҷавон “Сипоснома” ва туҳфаҳои хотиравӣ тақдим гардид.