Дар Ҷумҳурии Тоҷикистон 65 нафар омӯзгори забони русӣ ва 98 нафар омӯзгори забони англисӣ намерасад. Ин нуктаро 5-уми феврал Муҳаммадюсуф Имомзода, вазири маориф ва илми Ҷумҳурии Тоҷикистон зимни нишасти хабарӣ қайд намуд.

“Дар ҷумҳурӣ муаллимони забони русӣ намерасад, ин як чизи табиӣ аст, лекин мо кӯшиш мекунем, дар кӯтоҳтарин муҳлат ин мушкилотро ҳал намоем. Дар ин бора супориши Президент ва ҳам дастури Ҳукумат ҳаст, то норасоии омӯзгорони забони русиро аз байн бубарем. Мо барои ин кор имконият дорем”, - гуфт вазир.
  
Ҳамзамон вазир таъкид намуд, ки дар Тоҷикистон мушкилоти омӯзиши забони русӣ дар мактабҳо вуҷуд надорад.

“Дар саросари кишвар мактабҳо бо забони русӣ фаъол ҳастанд. Дар мактабҳо ҳам синфҳои русӣ ва ҳам синфҳои тоҷикӣ мавҷуданд. Мо қариб ягон мушкилот надорем. Ҳамаи масъалаҳое, ки миёни Тоҷикистону Русия буданд, аллакай ҳалли худро пайдо карданд”, - илова намуд, вазири маориф ва илми кишвар.