Дар нимсолаи якуми соли 2021 олимони Донишгоҳи давлатии тиббии Тоҷикистон ба номи Абӯалӣ Ибни Сино амалисозии 8 лоиҳаи илмии аз ҳисоби буҷети давлатӣ маблағгузоришаванда ва 28 мавзӯъҳои илмии ташаббусӣ ва корҳои илмӣ-тадқиқотии худро ба роҳ мондаанд.

Ин нуктаро 13 июл Гулзода Маҳмадшо, ректори донишгоҳ зимни нишасти матбуотӣ ба рӯзноманигорон қайд намуд.

Ӯ иброз дошт, ки аз ҷониби олимони ҷавони донишгоҳ усулҳои нави ташхисию табобатии бемории сироятии коронавирус ба роҳ монда шудааст. Ва ин кашфиётҳо дар протоколҳои клиникии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба қайд гирифта шудаанд. Инчунин олимону профессорон барои бартараф намудани ин бемории сироятӣ усулҳои навро дар амалия таҷриба карда истодаанд.

Ҳамзамон ӯ қайд намуд, ки донишгоҳ барои донишҷӯён шароити хуби муосирро фароҳам оварда, барои омода намудани мутахассисони хуби соҳаи тиб имконоти мавҷударо самаранок истифода менамояд. Инчунин мавсими эмгузаронии донишҷӯёни донишгоҳ хуб ҷараён дошта, марҳила ба марҳила ҳамаи донишҷӯён эм карда мешаванд.