Бо анҷом ёфтани соли таҳсил ва фаро расидани фасли тобистон ба масъалаи дар сатҳи зарурӣ ташкил намудани истироҳати тобистонаи кӯдакону наврасон, ҷалби бештари ин қишри ояндасози ҷомеа ба истироҳату фароғат, фароҳам овардани шароити муносиб дар истироҳатгоҳҳо, лагерҳои наздимактабӣ ва солимгардонӣ таваҷҷуҳи бештар равона мешавад. Зеро Ҳукумати Ҷумҳурии Тоҷикистон ин масъаларо дар аввалият қарор дода, ҳанӯз 26 феврали соли равон Қарори Ҳукумати Ҷумҳурии Тоҷикистон “Дар бораи ташкили истироҳати тобистонаи кӯдакон ва наврасон дар соли 2026” ба тавсиб расида буд. Дар зимн, ҷиҳати дар сатҳи баланди омодагӣ ва баргузор намудани мавсими истироҳати кӯдакону наврасон масъулини соҳаҳои дахлдор вазифадор шуда буданд.

Дар вилояти Суғд барои дар сатҳи баланд баргузор гардидани мавсими истироҳати кӯдакону наврасон, омода намудани истироҳатгоҳҳо ва шавқовару пурмаҳсул сипарӣ гардидани таътили тобистонаи хонандагон тадбирҳои зарурӣ андешида шудааст. Дар ҷаласаҳои ситоди вилоятии “Тобистон-2026” дар баробари омӯзиши раванди омодагиҳои истироҳатгоҳҳо, лагерҳои наздимактабӣ ва солимгардонӣ, ҳамзамон, ба масъалаи ташкили маҳфилҳои омӯзишӣ дар назди муассисаҳои таълимӣ, тақвияти ҳамкории муассисаҳои таълимӣ бо падарону модарони хонандагон ва назорати наврасону кӯдакон дар мавсими таътили тобистона таваҷҷуҳ равона шудааст.

Соли равон дар вилояти Суғд қарор аст, ки на кам аз 30 фоизи шумораи умумии хонандагон ба истироҳатгоҳҳо, лагерҳои наздимактабӣ ва солимгардонӣ, лагерҳои варзишӣ ва монанди ин ҷалб карда шаванд. Ин тасмим ба хотири ҳавасманд намудани хонандагон, дастгирии кӯдакону наврасони ятим, аз оилаҳои ниёзманд, фароҳам овардани шароити муносиби касбу ҳунаромӯзӣ, омӯзиши забонҳои хориҷӣ ва назорати хонандагон дар таътили тобистона арзёбӣ мешавад. Ба таъбири дигар, ин тасмим имкон медиҳад, ки кӯдакону наврасон таътили тобистонаро самарабахш сипарӣ намуда, саргарми корҳои беҳуда ва амалҳои номатлуб нашаванд.

Дар робита ба масъалаи раванди омодагиҳо дар истироҳатгоҳҳову лагерҳои наздимактабӣ, варзишиву солимгардонӣ бо шахсони масъули соҳаҳои дахлдор ҳамсуҳбат шудем. Маълум гардид, ки дар заминаи Қарори Ҳукумати Ҷумҳурии Тоҷикистон “Дар бораи ташкили истироҳати тобистонаи кӯдакон ва наврасон дар соли 2026” дар вилояти Суғд 27 апрели соли равон қарори раиси вилояти Суғд “Дар бораи ташкили истироҳати тобистонаи кӯдакон ва наврасон дар соли 2026” ба тавсиб расидааст.

Шарифулло Абдуллозода, раиси Шурои иттифоқҳои касабаи вилояти Суғд иброз дошт, ки дар асоси муқаррароти банди 2-и зербанди 2-и қарори мазкур корҳои омодагӣ, таъмиру сохтмони майдончаҳои варзишӣ, ҳавзҳои шиноварӣ дар истироҳатгоҳҳо бояд то 20 май пурра ба анҷом мерасид. Ба назари ҳамсуҳбати мо, ба фаъолияти ҳама гуна истироҳатгоҳҳо танҳо баъди гирифтани хулосаи мақомоти давлатии назорати санитарию эпидемиологӣ ва бехатарӣ аз сӯхтор иҷозат дода мешавад.
- Дар соли 2025 фарогирии кӯдакону наврасон дар вилояти Суғд ба ҳамаи намуди истироҳатгоҳҳо 111 ҳазору 689 нафарро ташкил дод. Дар ин давра фаъолияти истироҳатгоҳҳои шаҳру ноҳияҳои Гулистон, Истаравшан, Панҷакент, Бобоҷон Ғафуров, Спитамен, Ҷаббор Расулов, Деваштич, Зафаробод ва Шаҳристон нисбат ба соли 2024 беҳтар гардида, мутаносибан аз 21 то 50 фоизи хонандагон ба истироҳат фаро гирифта шуданд. Таҳлилҳо нишон медиҳанд, ки соли 2025 фарогирии кӯдакону наврасон ба истироҳатгоҳҳо дар шаҳру ноҳияҳои Хуҷанд, Бӯстон, Конибодом, Исфара, Мастчоҳ, Ашт, Айнӣ ва Кӯҳистони Мастчоҳ ба талабот ҷавобгӯ набуд ва масълини Мақомотҳои маҳаллии ҳокимияти давлатӣ, сохторҳои дахлдор уҳдадор шуданд, ки соли равон барои ҷалби ҳарчи бештари кӯдакону наврасон ба истироҳатгоҳҳо тадбирҳои судманд андешанд, - мегӯяд Шарифулло Абдуллозода.

ФАЪОЛИЯТИ ИСТИРОҲАТГОҲҲОИ БЕРУНАЗШАҲРӢ

Бар пояи маълумотҳои мавҷуда метавон хулоса намуд, ки яке аз сабабҳои кам ҷалб шудани кӯдакону наврасон дар таътили тобистона ба истироҳатгоҳҳо ин аз фаъолият боз мондан ё ҳамагӣ дар як - ду баст фаъолият намудани истироҳатгоҳҳои беруназшаҳрӣ мебошад. Соли гузашта ҳамагӣ 11 адад фаъолият намудааст. Бино ба маълумоти Раёсати маорифи вилояти Суғд соли равон фаъолияти 10 истироҳатгоҳи беруназшаҳрӣ, 855 лагерҳои рӯзонаи наздимактабӣ, 69 лагерҳои солимгардонӣ ва машғулиятҳои меҳнатӣ барои хонандагони синфҳои 9-10, 62 лагерҳои варзишӣ-беҳдоштӣ ба нақша гирифта шудааст.
- Омодагӣ ба мавсими нави истироҳат гарави таъмини фароғати хонандагон маҳсуб меёбад. Соли ҷорӣ фаъолияти истироҳатгоҳҳои беруназшаҳрии “Чашма”-и ноҳияи Деваштич, “Шоҳин”-и шаҳри Гулис-тон, “Гагарин”-и шаҳри Исфара, “Парасту”-и шаҳри Конибодом, “Маркази солимгардонии Суғд”, Истироҳатгоҳи кӯдакон, наврасон ва ҷавонони ба номи “20-солагии Истиқлолияти Ҷумҳурии Тоҷикистон” дар ноҳияи Ҷаббор Расулов, “Бободархон”-и ноҳияи Ашт, “Сиёвуш”-и ноҳияи Мастчоҳ, “Чиларча”-и шаҳри Панҷакент ва “Чашма”-и ноҳияи Зафаробод дар назар дошта шудааст, - гуфт муовини сардори Раёсати маорифи вилояти Суғд Абдураҳим Қурбониён

ҶАСАЛАҲОИ СИТОД

Бо мақсади дар сатҳи баланд ташкил ва баргузор намудани мавсими тобистонаи истироҳату фароғати кӯдакону наврасон дар истироҳатгоҳҳо дар вилояти Суғд ситоди вилоятии “Тобистон-2026” ташкил гардида, мунтазам баргузор мешавад. Ба иттилои Шарифулло Абдуллозода, раиси Шурои иттифоқҳои касабаи вилояти Суғд дар ҷаласаҳои ситоди вилоятӣ ҳамаи масъалаҳои марбут ба истироҳати тобистонаи кӯдакону наврасон, омодагии истироҳатгоҳҳо, ҷалби бештари хонандагон ба истироҳат ва дар сатҳи баланд роҳандозӣ шудани мавсими тобистонаи истироҳати хонандагон таҳлилу баррасӣ шудааст.

- Вобаста ба ин метавон гуфт, ки чанде пеш бо иштироки роҳбари ситоди вилоятӣ -муовини раиси вилояти Суғд Зайнура Азимӣ ҷаласаи навбатии ситод баргузор гардид, ки дар он муовинони раисони як қатор шаҳру ноҳияҳо, сарпарастони соҳа, мудирони шуъбаҳои маориф, аъзоёни ситод, масъулини Иттифоқҳои касаба ҳузур доштанд. Дар ҷаласа қатъиян талаб карда шуд, ки ба масъалаи ташкилу баргузории истироҳату фароғати кӯдакон дар истироҳатгоҳҳо, омодагии лагерҳо ва корҳои ташкилӣ таваҷҷуҳи зарурӣ равона карда шавад.

Масъалаҳои ҷалби мутахасисони варзида ба истироҳатгоҳҳо, фаро гирифта шудани хонандагони болаёқат, кӯдакону наврасони ятим, аз оилаҳои ниёзманд ба истироҳатгоҳҳо, таъмини бехатарии хонандагон ҳангоми истироҳат, таъмини ғизои солим ва ташкили барномаҳои маърифативу фарҳангӣ ҳам дар маркази таваҷҷуҳ қарор гирифт. Масъулини шаҳру ноҳияҳо ва сохторҳои дахлдор уҳдадор шуданд, ки талаботҳои қарори Ҳукумати Ҷумҳурии Тоҷикистон “Дар бораи ташкили истироҳати тобистонаи кӯдакон ва наврасон дар соли 2026” ва қарори раиси вилояти Суғд “Дар бораи ташкили истироҳати тобистонаи кӯдакон ва наврасон дар соли 2026”-ро иҷро намоянд.

ТАШКИЛИ БАРНОМАҲОИ МАЪРИФАТИВУ ФАРҲАНГӢ

Ба назари масъулин, дар баробари таъмиру навсозии иншооти мавҷудаи истироҳатгоҳҳо бояд ба масъалаи дар сатҳи зарурӣ ташкилу роҳандозии чорабиниҳо, пурзӯр намудани фаъолияти созмонҳои хонандагон ва дар сатҳи баланд роҳандозӣ шудани пазироии кӯдакону нав-расон ба истироҳатгоҳҳо эътибори аввалиндараҷа дода шавад. Абдураҳим Қурбониён, муовини сардори Раёсати маорифи вилояти Суғд бо тасдиқи ин гуфтаҳо илова намуд, ки дар тамоми истироҳатгоҳҳои ҳудуди вилоят, новобаста аз шакли моликият зарур аст, ки фаъолияти китобхонаҳо ба роҳ монда шавад. Ба назари ҳамсуҳбати мо, барои таъмини китобхонаи истироҳатгоҳҳо бо китобҳои бадеӣ ва ҷалби истироҳаткунандагон ба китобхонӣ андешидани чораҳои таъхирнопазир зарур аст.

- Ташкили бозиҳои гуногуни миллӣ, мусобиқаҳои варзишии шашкаю шоҳмот, тенниси рӯи миз, волейболу футбол, баскетбол ва дигар бозиҳои шақовар дар солимии кӯдакону наврасон, ҳавасмандсозии онҳо ва хотирмон сипарӣ шудани таътили тобистона мусоидат мекунад. Ҳангоми боздид аз истироҳатгоҳҳо ва лагерҳои наздимактабиву солимгардонӣ мо ба шахсони масъул тавсияҳо дар ин бобат додем, то ба истироҳати кӯдакону наврасон фароғати бештар зам шавад.

Кӯдакону наврасон ин ояндаи мо ҳастанд ва бо назардошти ҳамин аз ҷониби давлату Ҳукумат барои таҳсил, истироҳату фароғати онҳо тамоми шароит фароҳам аст. Бо боварӣ метавон гуфт, ки бо ҳисси масъулиятшиносӣ ва маҳорати баланди касбии кормандон соли равон мавсими истироҳату фароғати кӯдакону наврасон дар истирҳатгоҳҳо дар сатҳи баланд ҷараён мегирад, - андешаҳои худ-ро чунин хулоса намуд Абдураҳим Қурбониён.

КӮДАКОНУ НАВРАСОНИ ЯТИМ ВА АЗ ОИЛАҲОИ НИЁЗМАНД ДАР МАДДИ АВВАЛ

Маълум аст, ки Ҳукумати Ҷумҳурии Тоҷикистон дастгирӣ ва ғамхориро нисбат ба ятимону фарзандони оилаҳои ниёзманд дар мадди аввал гузоштааст. Дар партави дастуру ҳидоятҳои раҳнамунсози Пешвои миллат муҳтарам Эмомалӣ Раҳмон дар вилояти Суғд ба ятимону кӯдакони аз оилаҳои ниёзманд ҳамеша ғамхорӣ карда мешавад. Ҳамин аст, ки ҳар сол бо дастгирии Мақомоти иҷроияи ҳокимияти давлатии вилояти Суғд, Иттифоқҳои касаба ва ташкилоту муассисаҳо шумораи зиёд аз ҳисоби кӯдакону наврасони ятим, аз оилаҳои ниёзманд ба истироҳатгоҳҳо фаро гирифта мешаванд.

- Иқдомҳои пайвастаи Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба таъмини ҳаёти осоиштаи кӯдакон ва риояи ҳуқуқу озодиҳои онҳо, дар руҳияи меҳру муҳаббат ба Ватан ва ҳамчун насли солиму созанда тарбия намудани кӯдакон равона гардидааст. Дар натиҷаи ин саъю талошҳо ҳаёти кӯдакони кишвар сол аз сол беҳтару рангинтар гардида, ҳамасола таваҷҷуҳи наврасону кӯдакон ба истироҳатгоҳҳо, аз ҷумла, истироҳатгоҳи "Маркази солимгардонии Суғд" бештар мегардад.

Дар давраи истироҳати кӯдакон ва наврасон, кормандони истироҳатгоҳ ба масъалаҳои пешгирии ҳуқуқвайронкунӣ дар байни наврасон, бемориҳои сироятӣ, бехатарӣ аз сӯхтор ва тарбияи ватандӯстӣ, интизом ва эҳтиром ба арзишҳои миллӣ вохӯрию суҳбатҳо ташкил намуда, ҳамчунин, бо ташаббус ва худфаъолиятии кӯдакон чорабиниҳои фарҳангӣ-оммавӣ, варзишӣ, маҳфилҳо ташкил карда мешаванд.

Истироҳатгоҳи "Маркази солимгардонии Суғд" барои фаъолият дар мавсими нав омода буда, дар чор баст фаъолияти худро ба роҳ мемонад. Мо тасмим гирифтем, ки имсол ҳам кӯдакону наврасони ятим, аз оилаҳои ниёзманд, фарзандони омӯзгору кормандони соҳа ва хонандагони фаъолу болаёқатро бештар ба истироҳатгоҳ ҷалб намоем. Ин вазифаи аввалиндараҷаи мост, - мегӯяд Мӯсобек Самизода.

Омӯзишу пайгирии мавзуъ нишон медиҳад, ки дар вилояти Суғд раванди омодагиҳо ба истироҳату фароғати кӯдакону наврасон дар истироҳатгоҳҳо, лагерҳои наздимактабӣ ва солимгардониву варзишӣ ба таври зарурӣ ҷараён дорад.

Субҳиддин ҚОДИРОВ, “ҶТ”