Дар нимсолаи аввали соли 2020 ҳайати омӯзгорони Донишгоҳи технологии Тоҷикистон соҳиби 2 патент оид ба ихтирооти Ҷумҳурии Тоҷикистон ва ду санади татбиқотӣ гардидаанд.

Роҳбарияти Донишгоҳи технологии Тоҷикистон ин нуктаро 20-уми июл зимни нишасти хабарӣ иброз дошта, дар идома гуфта шуд, ки ҳамчунин ҳоло барои дарёфти 2 патент дархост ба Маркази миллии пантенту иттилоот ирсол шудааст.

Дар идомаи нишаст вобаста ба масоили иҷтимоӣ дар донишгоҳ қайд гардид, ки дар ДТТ айни ҳол 12 нафар донишҷӯёни ятими кулл, 13 донишҷӯи маъюб ва 380 донишҷӯи нимятим ба қайд гирифта шуда, дар соли 2020 ба 17 донишҷӯ вобаста ба вазъи мушкилоти молиявии оилавӣ ва фавти падару модар дар давраи таҳсил кумакпулии якдафъаинаи молиявӣ ва озод намудан аз пардохти маблағи таҳсил тибқи қарори Шӯрои олимон расонида шудааст. Ҳамчунин дар арафаи ҷашнҳо ба 25 нафар донишҷӯи ятиму маъюб аз ҷониби раёсати донишгоҳ ёрдампулӣ дар ҳаҷми 18 900 сомонӣ расонида шуд.