Дар вилояти Хатлон даври вилоятии озмуни ҷумҳуриявии “Фурӯғи субҳи доноӣ китоб аст” оғоз гардид.

Дар ин бора хадамоти матбуоти раиси вилояти Хатлон иттилоъ медиҳад.

Бино ба иттилои манбаъ, имрӯз дар Донишгоҳи давлатии Кӯлоб ба номи Абуабдуллоҳи Рӯдакӣ кушодашавии даври вилоятии озмуни ҷумҳуриявии “Фурӯғи субҳи доноӣ китоб аст” бо иштироки Анзурат Абдусаломзода, муовини раиси вилояти Хатлон ва дигар масъулин сурат гирифт.

Иттилоъ дода шуд, ки дар озмуни мазкур 1121 довталаб иштирок менамояд, ки аз ин шумора 704 нафарашро занону духтарон ташкил медиҳад.

- Ба хотири таъмини пурраи шаффофият, пешгирӣ аз ҳолатҳои баҳогузории ғайримеъёрӣ ва қонеъ гардонидани дархости иштирокчиён зарур аст, ки рафти даври сеюми озмун пурра ба навор гирифта шавад, - зикр гардидааст дар хабар.

Ба аъзои ҳакамон супориш дода шуд, то дар рафти озмун шаффофиятро таъмин намуда, аз рӯйи принсипи ягона ба иштирокчиён баҳогузорӣ карда, нафарони лаёқатмандро ба даври ҷумҳуриявӣ пешниҳод намоянд.

Бояд гуфт, ки ҳадафи асосии баргузории озмуни мазкур ин пеш аз ҳама баланд бардоштани завқи китобхонӣ, дарёфти чеҳраҳои нави суханвариву сухандонӣ, арҷ гузоштан ба арзишҳои миллию фарҳангӣ ва инкишофи қобилияти эҷодӣ, таҳкими эҳсоси худшиносӣ, ғанӣ гардонидани захираи луғавӣ, тақвияти ҷаҳони маънавӣ ва баландгардонии доираи забондонӣ миёни қишрҳои мухталифи ҷомеа, аз ҷумла хонандагону донишҷӯёни ҳамаи зинаҳои таҳсилот ва шаҳрвандони кишвар мебошад.
Мавриди зикр аст, ки даври сеюми озмуни мазкур аз 15-ум то 27-уми августи соли равон идома ёфта, беҳтаринҳо ба даври ҷумҳуриявӣ роҳхат мегиранд.