1 –уми октябр таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон муҳтарам Маҳмадтоир Зокирзода ҷаласаи якуми иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати шашум баргузор гардид.

Дар ҷаласаи мазкур лоиҳаи чандин қарор ва қонунҳои кишвар муҳокима ва чанде аз онҳо қабул гардид.

Аз ҷумла, дар баробари дигар лоиҳаҳо лоиҳаи Қонуни конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ” ва Қонуни Ҷумҳурии Тоҷикистон “Дар бораи маориф” мавриди баррасӣ қарор гирифт.

Доир ба ин ду қонун муовини якуми вазири маориф ва илми Ҷумҳурии Тоҷикистон Муҳаммаддовуд Саломиён баромад карда, иброз дошт, ки лоиҳаҳои мазкур 30 июли соли 2020 дар ҷаласаи Ҳукумати Ҷумҳурии Тоҷикистон таҳти №422 ва 423 тасдиқ шуда, барои баррасӣ ба Маҷлиси намояндагони Маҷлиси Олии Ҷумҳурии Тоҷикистон пешниҳод шудаанд.

Аз ҷумла афзуд: “Тағйиру иловаҳо ба моддаи 33-и Қонуни Ҷумҳурии Тоҷикистон “Дар бораи маориф” ва моддаи 201/1-и Қонуни конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ” пешбинӣ шудааст. Ҳадафи таҳияи лоиҳа дар мувофиқа бо раисони вилоят ва шаҳру ноҳияҳо ба вазифа таъин ва аз вазифа озод кардани сардорони сарраёсат, сарраёсати маориф, раёсати маориф ва мудирони шуъбаҳои маорифи шаҳру ноҳия ва вилоятҳои Ҷумҳурии Тоҷикистон мебошад”.

Ҳамзамон гуфта шуд, ки аз ҷониби Вазорати маориф ва илми кишвар таъин накардани сардорони сарраёсати маориф, раёсати маориф, мудирони шуъбаҳои маориф боиси сари вазифа омадани шахсони тасодуфӣ ва бесалоҳият шуда, сабабгори кам гардидани эътибори омӯзгор дар ҷомеа шуда буд.

Лозим ба зикр аст, ки дар асоси тағйироти мазкур минбаъд сардорони сарраёсати маориф, раёсати маориф, мудирони шуъбаҳои маориф, на аз ҷониби раисони шаҳру ноҳияҳо, балкӣ мақоми ваколатдор дар самти маориф Вазорати маориф ва илми Ҷумҳурии Тоҷикистон таъин ва озод карда мешаванд, ки ин барои баланд бурдани нуфузи омӯзгорон дар кишвар, ҳамчунин боло бурдани сатҳу сифати соҳаи мазкур кӯмак мерасонад.