10628 нафар довталаб дар ИМД-2021 аз қайди Маркази милли тестии назди Президенти Ҷумҳурии Тоҷикистон гузашта, дар имтиҳонҳо иштирок накардаанд.

Дар ин бора Икромӣ Хуршед Икром, директори Маркази милли тестии назди Президенти Ҷумҳурии Тоҷикистон зимни нишасти хабарӣ ба намояндагони васоити ахбори омма иттилоъ дод.

Гуфта шуд, ки аз шумори довталабони зикршуда 9819 довталаб дорои таҳсилоти миёнаи умумӣ (синфи 11-ум), ибтидоӣ ва миёнаи касбӣ ва 810 довталаб дорои таҳсилоти умумии асосӣ (синфи 9-ум) мебошанд.

Ҳамчунин зикр гардид, ки барои дақиқ кардани сабабу омилҳои иштирок накардани довталабон дар имтиҳонҳо аз ҷониби марказ миёни довталабон пурсиш гузаронида шуд. Тибқи таҳлилҳои пурсиш маълум гардид, ки 28,0%-и пурсидашудагон бо сабаби надоштани имкони пардохти маблағи таҳсил ба имтиҳонҳо ҳозир нашудаанд. 29,1%-и дигар сабаби инро ба рафтан ба муҳоҷират, 8,1% таҳсил дар хориҷа ва 5,5%-и пурсидашудагон ба надоштани имкони таҳсил дур аз макони зисти худ рабт додаанд.