5 сентябр бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар Донишгоҳи байналмилалии сайëҳӣ ва соҳибкории Тоҷикистон бахшида ба 33- солагии Истиқлоли давлатии Ҷумҳурии Тоҷикистон ҳамоиши ҷашнии ҷавонону варзишгарон таҳти унвони “Нақши ҷавонон дар таҳкими истиқлоли давлатӣ” баргузор гардид.

Дар он Зулфиқор Гулаҳмадзода, раиси Кумитаи кор бо ҷавонон ва варзиш, Кароматулло Олимов, академики Академияи миллии илмҳои Ҷумҳурии Тоҷикистон, Фаридун Исматуллозода, раиси Иттифоқи касабаи кормандон ва омӯзгорони Академияи идоракунии давлатии назди Президенти Ҷумҳурии Тоҷикистон, Асҳобиддини Шералӣ, директори Литсей барои хонандагони болаёқат дар шаҳри Душанбе, Темур Раҳимов, ҷоизадори Бозиҳои олимпӣ дар соли 2024 ва кормандони Кумитаву сохторҳои он, Ҷоизадорони ҷоизаи давлатиии ба номи Исмоили Сомонӣ, мудирони шуъбаҳои кор бо ҷавонон ва ҷавонони фаъол ширкат намуданд.

Гуфта шуд, ки истиқлол беҳтарин дастовард барои миллати тоҷик буда, он бо кӯшишу ҷонбозиҳои фарзанди фарзонаи миллат муҳтарам Эмомалӣ Раҳмон пойдору мустаҳкам гардид.

Таъкид гардид, ки маҳз бо дастгирӣ ва раҳнамоиҳои Пешвои миллат муҳтарам Эмомалӣ Раҳмон мебошад, ки имрӯзҳо ҷавонону варзишгарони кишвар дар баробари дигар қишри фаъоли ҷомеа бо ҳисси баланди ватандӯстӣ барои ҳимояи сулҳу оромӣ, суботи сиёсӣ, таҳкими ваҳдати миллӣ, ҳимояи манфиатҳои миллату давлат ва муаррифии шоистаи Тоҷикистон дар арсаи байналмилалӣ содиқона талош намуда, ин анъанаро минбаъд низ бо масъулияти том идома хоҳанд дод.

Сипас чанде аз иштирокчиёни ҳамоиш бо сипосномаҳои Кумитаи кор бо ҷавонон ва варзиш қадрдонӣ шуда, дар идома барномаи фарҳангии тараннумгари Истиқлол ва ватандӯстӣ манзури аҳли нишаст гардонида шуд.

Гулафшон КАРИМОВА, “ҶТ”