МАОРИФ ВА ИЛМ
Шанбе 22 Июн 2024 11:04
6651
3 декабр дар шаҳри Бохтар даври сеюми вилоятии озмуни ҷумҳуриявии “Фурӯғи субҳи доноӣ…” ҷамъбаст ва ғолибон муайян гардиданд.

Ғазалшоҳ Сафарзода, роҳбари дастгоҳи раиси вилояти Хатлон, зимни ифтитоҳи маросими ҷоизадорони озмун зикр намуд, ки ин сабқати фарҳангӣ ҷиҳати иҷрои Амри Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон аз 9 феврали соли 2019 доир гардида, дар даври вилоятии озмуни ҷумҳуриявии “Фурӯғи субҳи доноӣ…” наздик ба 400 довталаб иштирок карданд ва дар маҷмӯъ 40 нафар аз вилоят ба даври чаҳорум – марҳилаи ҷумҳуриявии озмун роҳхат гирифтанд.

“Ҳадафи асосии озмун баланд бардоштани завқи китобхонӣ, тақвияти ҷаҳони маънавӣ ва фаъолгардонии доираи забондонӣ миёни қишрҳои мухталифи ҷомеа, баланд бардоштани фарҳанги китобдориву китобхонӣ ба ҳисоб меравад”, - зикр намуд Ғ. Сафарзода.

Раисии ҳайати ҳакамони даври вилоятии озмунро, ки рӯзҳои 24-26 ноябр дар маркази вилоят идома кард, вазири маориф ва илми Тоҷикистон Нуриддин Саид ба уҳда дошт.

Дар асоси протоколи ҷамъбастии ҷаласаи комиссияи баргузории озмуни ҷумҳуриявии “Фурӯғи субҳи доноӣ…” аз 27 ноябри соли 2019, нафарони зерин ғолиб дониста шуданд:

1. Дар номинатсияи аз ёд кардану хондани осори адибони классикии тоҷик:

Ҷойи якум - Сафармоҳи Аҳмадбек, ноҳияи Ёвон;

Ҷойи дуюм–Каримов Султон, ноҳияи Ёвон;

Ҷойи сеюм - Талбакова Банда, шаҳри Кӯлоб.

2. Дар номинатсияи аз ёд кардану хондани осори адибони муосири тоҷик:

Ҷойи якум – Маҳсумаи Маҳмурод, ноҳияи Ёвон;

Ҷойи дуюм – Ширини Мирбадал, шаҳри Бохтар;

Ҷойи сеюм – Темурова Фарзона, ноҳияи Ёвон.

3. Дар номинатсияи аз ёд кардану хондани ашъори бачагона ва афсонаву ривоятҳои халқи тоҷик:

Ҷойи якум – Ятимова Нурбону, ноҳияи Ёвон;

Ҷойи дуюм – Кароматзода Ҳумайнӣ, ноҳияи Данғара;

Ҷойи сеюм – Ҷабборова Мадина, ноҳияи Кӯшониён.

4. Дар номинатсияи аз ёд кардану хондани осори адабиёти ҷаҳон:

Ҷойи якум - Муминова Майсуна, ноҳияи Данғара;

Ҷойи дуюм - Қодирова Робия, шаҳри Кӯлоб;

Ҷойи сеюм - Қадамов Файзулло, ноҳияи Кӯшониён.

Ғолибони ҷойи якум бо шаҳодатнома ва 5 ҳазор сомонӣ мукофотпулӣ, ғолибони ҷойҳои дуюму сеюм низ бо шаҳодатнома ва мутаносибан 3000 ва 2000 сомонӣ қадрдонӣ карда шуданд.

Инчунин, 28 иштирокчии дигар, ки ба даври ҷумҳуриявии озмун роҳхат ба даст оварданд, ҳар яке бо Ифтихорномаи мақомоти иҷроияи ҳокимияти давлатии вилояти Хатлон ва 1000 сомонӣ мукофотпулӣ сарфароз гардонида шуданд.

Ба 34 иштирокчии дигари фаъол, ҳарчанд ба даври ҷумҳуриявии озмун роҳхат дарёфт накарданд, Сипоснома ва ба андозаи 500 сомонӣ мукофотпулӣ тақдим карда шуд.

Даври чоруми озмун барои ғолибон то 20 декабри соли 2019 дар Муассисаи давлатии “Китобхонаи миллии Тоҷикистон” дар шаҳри Душанбе ҷамъбаст мешавад. Дар ҷамъбаст ба иштирокчии фаъол, ки шартҳоро аз рӯйи талаботи Низомномаи озмун иҷро мекунад, Шоҳҷоиза ба маблағи 50000 сомонӣ тақдим мегардад.

Баргузории озмуни мазкур аз он шаҳодат медиҳад, ки дар қатори паҳлӯҳои мухталифи сиёсати пешгирифтаи Сарвари давлат рушди неруи маънавии ҷомеа низ дар маркази таваҷҷуҳи роҳбарияти олии мамлакат қарор дорад.

Ёдовар гардид, ки тибқи Амри Президенти Ҷумҳурии Тоҷикистон муҳтарам Эмомалӣ Раҳмон ба ифтихори ҷашни 30-солагии Истиқлолияти давлатии Ҷумҳурии Тоҷикистон таҳти сарпарастии Пешвои миллат миёни қишрҳои гуногуни ҷомеа озмуни ҷумҳуриявии “Фурӯғи субҳи доноӣ…” эълон гардидааст.

Эзоҳи худро нависед



Рамзҳо дар расм