Айни ҳол дар Донишкадаи давлатии забонҳои Тоҷикистон ба номи С. Улуғзода 109 нафар шаҳрвандони хориҷӣ аз ҷумҳуриҳои Қазоқистон, Туркманистон, Қирғизистон, Мисри Араб ва Ҷумҳурии федеративии Бразилия таҳсил мекунанд.

Дар гузашта сафи донишҷӯёни хориҷӣ ба 10 нафар мерасид. Омили афзоиши шумораи донишҷӯёни хориҷӣ дар донишкадаро ректори он М. Раҷабзода зимни нишасти матбуотӣ ба журналистон шарҳ надод, вале қайд намуд, ки барои соли таҳсили 2018-2019 низ аз довталабони хориҷӣ зиёда аз 100 аризаву мактуб гирифтаанд.

Бо қабул шудани ин шумори довталабон ба донишкада ҳиссаи донишҷӯёни хориҷӣ 7 дарсади умумии донишҷӯёни донишкадаро ташкил хоҳад дод.

Ҳамзамон гуфта шуд, ки донишкада дар оянда ният дорад, барои мустаҳкамтар гардонидани робитаҳои фарҳангии кишвар бо мамолики хориҷ як факултет бо номи “Муносибатҳои байни фарҳангӣ” ва баҳри рушд додани тарҷумаи асарҳои олимону адибони хориҷӣ ва дохилӣ факултаи “Тарҷумонӣ” таъсис диҳанд.