Дар ҳошияи Паёми Пешвои миллат

«Мо таъмини истиқлолияти энергетикӣ ва истифодаи самарабахши неруи барқ, аз бунбасти коммуникатсионӣ баровардан ва ба кишвари транзитӣ табдил додани Тоҷикистон, ҳифзи амнияти озуқаворӣ ва дастрасии аҳолии мамлакат ба ғизои хушсифат, инчунин, вусъатдиҳии шуғли пурмаҳсулро ҳамчун ҳадафҳои стратегии худ интихоб намуда, нақшаи гузариши иқтисодиёти кишварро аз шакли аграрӣ - индустриалӣ ба индустриалӣ - аграрӣ амалӣ гардонида истодаем». Маҳз ҳамин нуктаҳо, ки дар Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба Маҷлиси Олӣ садо доданд, моро низ водор кунонд, ки ҳама дар якҷоягӣ метавонем мушкилиҳоро паси сар карда, Ватанамонро ободтар созем. Дар баробари ин Пешвои муаззами миллат аз ҳадафи чоруми миллӣ дар паёми имсолаи худ, ки саноатикунонии босуръати кишвар мебошад хабар доданд.

Воқеан, ҳифзи озодиву истиқлолият ва манфиатҳои милливу давлатӣ вазифаи муҳимтарини ҳар як фарди бонангу номус, ватандӯсту ватанпарвар ва худшиносу худогоҳи ин мамлакат аст.

Паёми Пешвои миллат, муҳтарам Эмомалӣ Раҳмон ба Маҷлиси Олии мамлакат дар замоне ироа гардид, ки Тоҷикистон ба марҳилаҳои нави рушд ворид гардида мардуми кишвар ба сӯи ояндаи дурахшон дилпурона қадам мегузорад. Бо боварии зиёд гуфта метавонем, ки ин суханҳои роҳбари давлат дар ин раванд барои таъмини амният, сулҳу суботи ҷомеа ва ваҳдати миллӣ, ба хотири ҳифзу таҳкими дастовардҳои замони соҳибистиқлоли ва пешрафти босуботи иқтисоди миллӣ, аз худ намудани ҳамаи самтҳои зиндагӣ ҷорӣ намудани намудани навгониҳои илму техника, дарки масъалаҳои афзалиятдоштаи пешрафти мамлакат ва ҳалли саривақтии он равона гардидаасту ин иқдом аз ҳар яки мо масъулияти дучандро талаб мекунад.

Паёми Президент, дар ҳақиқат аз ҷиҳати таҳлил вусъатнок ва илман асоснок буда, паём аз шукуфоии ватан ва ояндаи дурахшони кишвару халқи худ аст. Аз ин рӯ, Паём барномаи амали ҳар яки мо бояд бошад. Он бояд барномаи амалу фаъолияти ҳар фарди мамлакат бошад, то ки дар асоси он барои рӯзгори осудаи худу фарзандон, шукуфоии диёр аз сидқи дил меҳнат кунанд. Танҳо дар ҳамин сурат орзуҳои наҷиби ҳар як шаҳрванд метавонад ҷомаи амал пӯшад.

Ин Паём ҳамчун ҳуҷҷати муҳиме, ки самтҳои асосии сиёсати дохиливу хориҷии мамлакатро муайян месозад, бояд мавриди омӯзиш, тарғиб ва баҳрабардории ҷомеъа қарор гирад. Он ҳамчун дастури муҳим натанҳо барои ҳар як аъзои порлумон, балки ҳамаи шахсоне, ки вазифаҳои масъули давлатиро бар дӯш доранд, дар таъмини амнияти сиёсиву иқтисодӣ ва илмию фарҳангӣ саҳмгузор бошанд.

Бояд гуфт, ки дастгирии соҳаҳои иҷтимоӣ ҳамеша дар мадди аввали сиёсати давлат ва Ҳукумати мамлакат қарор дорад бо ҳамин сабаб дар даврони истиқлолият аз ҳисоби буҷет дар соли 2019 нисбат ба соли 2018 ба соҳаҳои фарҳангу варзиш 17,3 фоиз, илму маориф 14, суғуртаи иҷтимоӣ ва ҳифзи иҷтимоии аҳолӣ 9,5 ва тандурустӣ 7,2 фоиз зиёд маблағ равона карда мешавад, дар баробари ин қисми даромади буҷети давлатӣ аз 6,5 миллиард сомонии соли 2010 дар соли 2019 ба 24 миллиард сомонӣ расонида мешавад, ки афзоиши он қариб 4 баробар ва ҳиссаи хароҷоти соҳаҳои иҷтимоӣ 43,7 фоизро ташкил медиҳад, қайд карданд Пешвои милат.

Дар 10 соли охир ба иқтисодиёти Тоҷикистон дар ҳаҷми зиёда аз 33 миллиард сомонӣ сармояи мустақими хориҷӣ ворид гардидааст, ки қисми зиёди он ба рушди соҳаҳои энергетика, алоқа, сохтмон, истихроҷу коркарди канданиҳои фоиданок ва бунёди инфрасохтор равона шудааст.

Дар ин давра ба давлату Ҳукумати Тоҷикистон муяссар шуд, ки дар таъмини истиқлолияти энергетикӣ бо маблағгузории 36 милиард сомонӣ иншоотӣ хурду азими муҳимро оид ба истеҳсолу интиқоли барқ сохта, ба истифода диҳад. Аз ҷумла, дар ин давра низоми ягонаи энергетикии кишвар бунёд гардида, 1520 мегаватт зиёд карда шуд ва беш аз 1300 километр хатҳои интиқоли барқи баландшиддат сохта, ба истифода дода шуданд. Ҳамин сиёсати хирадмандонаи Пешвои миллат буд, ки соли ҷорӣ мо натанҳо барои ноил шудан ба истиқлолияти энергетикӣ қадами устувор гузоштем, балки бори аввал дар 27 соли соҳибистиқлолии кишварамон ду соли охир мардуми мамлакатро пурра бо барқ таъмин намуда, дар ҳаҷми қариб 3 миллиард киловатт - соат нерӯи барқ содирот кардем.

Мусаллам аст, ки рушди фаъолияти соҳибкорӣ кафили инкишофи боэътимоди иқтисодиёт ва паст гардидани шиддати таъсири буҳрон буда, барои афзун шудани буҷети давлатӣ мусоидат хоҳад кард. Пешвои миллат дар ин самт пешниҳод намуданд, ки бо мақсади дастгирии минбаъдаи соҳибкорон дар кишварамон 300 рӯзи ислоҳот оид ба дастгирии соҳибкорӣ ва беҳтар намудани фазои сармоягузорӣ амалӣ карда шавад.

Бо мақсади вусъат бахшидан ба дастовардҳои миллӣ ва бо дарназардошти зарурати инкишофи инфрасохтори деҳот пешниҳод карданд, ки солҳои 2019-2021 “Солҳои рушди деҳот, сайёҳӣ ва ҳунарҳои мардумӣ» эълон гардад.

Чунин мешуморем, ки Паёми Пешвои миллат муҳтарам Эмомалӣ Раҳмон ба Маҷлиси Олии кишвар дар шароити имрӯзаи ҷаҳони пуртазод нақшаҳои муҳими давлату Ҳукумат, ҷомеа ва ҳар як шаҳрвандро хуб инъикос намудааст. Аз ин рӯ, ҳамаи мо дар ҳамбастагию ҳамҷоягӣ метавонем корҳои азими созандагиро ба анҷом расонида, ба ҳадафҳои пешгирифтаи Ҳукумати ҷумҳурӣ ва Пешвои миллатамон бирасем.

НУРАЛИЗОДА Амрулло Назрулло,
муовини ректор оид ба таълими Донишгоҳи давлатии молия ва иқтисоди Тоҷикистон