Имрӯз ҳайати 12 нафараи Иттифоқи журналистони Узбекистон бо роҳбарии раиси ин иттифоқ Олимҷон Усаров ба шаҳри Душанбе омад. Меҳмононро Раиси Иттифоқи журналистони Тоҷикистон Зинатуллоҳи Исмоил ва намояндагони мақомоти иҷроияи ҳокимияти давлатии шаҳри Душанбе истиқбол гирифтанд.

Дар ин бора АМИТ “Ховар” хабар дод.

Бино ба иттилои ин агентӣ меҳмонон аз 12 то 16 октябр аз минтақаҳои кишвар, аз ҷумла шаҳрҳои Турсунзода, Норак, Панҷакент ва ноҳияи Данғара дидан менамоянд.

АМИТ “Ховар” қаблан иттило дода буд, ҳайати журналистони узбек дар доираи ин сафар бо дастовардҳои солҳои соҳибистиқлолии Тоҷикистон шинос гардида, дар толори Академияи ВАО бо ҳамкасбони худ вомехӯранд.

Гуфта мешавад, ки меҳмонон рӯзи аввали сафар аз Кохи матбуот ва Идораи телевизион ва радиои вилояти Суғд дидан намуда, бо кору шароити ҳампешагони худ ошноӣ пайдо намуданд. Баъдан ба Минтақаи озоди иқтисодии Суғд рафта, аз корхонаҳои нави саноатӣ дидан карданд.

Дар доираи ин сафар журналистони Тоҷикистону Узбекистон дурнамои ҳамкории минбаъдаро баррасӣ хоҳанд кард.

Лозим ба зикр аст, ки 7 майи соли 2022 дар шаҳри Тошканд миёни Иттифоқи журналистони Тоҷикистон ва Иттифоқи журналистони Узбекистон Ёддошти ҳамкорӣ ба имзо расонида шуд. Дар асоси ин ҳар сол як маротиба ҳайатҳои эҷодӣ бояд ба кишварҳои ҳамдигар сафар намоянд.