Ҷон Керрӣ, котиби давлатии ШМА, дар мулоқот бо вазирони корҳои хориҷии 5 кишвари Осиёи Марказӣ (ОМ) даъват кард, ки ҳамкориҳо дар самти мубориза бо терроризм ва ҳавасмандии рушди иқтисодӣ густариш дода шаванд.

Котиби давлатии ШМА гуфт, Штатҳои Муттаҳида масъулияти иҷрои як қатор лоиҳаҳоро дар ОМ бар зимма гирифтааст ва онҳоро то охир анҷом хоҳад дод. Ӯ изҳор дошт, ки ҳукумати ШМА барои тақвияти ҳамкориҳо дар самти мубориза бо терроризм, савдо ва нақлиёт мусоидат намуда, ба афзоиши лоиҳаҳои энергетикии аз нигоҳи экологӣ тоза 15 миллион доллар ҷудо кардааст.

Вай қайд кард, ки Штатҳои Муттаҳида бе дудилагӣ аз соҳибихтиёрӣ, тамомияти арзӣ ва истиқлолияти ҳар як кишвари ОМ ҳимоят менамояд.

Гуруҳи "С5+1", ки ба ҳайати он Тоҷикистон, Узбекистон, Қирғизистон, Қазоқистон, Туркманистон ва Штатҳои Муттаҳидаи Амрико шомиланд, бори нахуст дар ин сатҳ моҳи ноябри соли 2015 дар шаҳри Самарқанд дидору гуфтугӯ карда буданд.