Дар пойтахти Ҷумҳурии Тоҷикистон – шаҳри Душанбе омодагӣ ба конфронси навбатии Душанбе - “Ҳамкории байналмилалӣ ва минтақавӣ оид ба амният ва мудирияти сарҳад ҷиҳати муқовимат ба терроризм ва пешгирӣ аз ҳаракати террористҳо” идома дорад.

Дар ин бора АМИТ “Ховар” аз қавли Ҳотам Қурбонов, муовини сардори Раёсати созмонҳои байналмилалии Вазорати корҳои хориҷии Тоҷикистон иттилоъ медиҳад.

Бино ба иттилои манбаъ, барои иштирок дар конфронси мазкур, ки 18 - 19 октябри соли равон дар назар аст, намояндагони зиёда аз 50 кишвари ҷаҳон, инчунин роҳбарияти созмонҳои байналмилалию минтақавӣ, намояндагони ҷомеаи шаҳрвандӣ, доираҳои илмӣ ва дигарон дархост ирсол кардаанд.

Вазорати корҳои хориҷии Тоҷикистон мегӯяд, ҳадафҳои Конфронси зиддитеррористии Душанбе ин баррасии масоили марбут ба пешгирӣ аз ҳаракати террористҳо, мудирияти муассири сарҳадот, иқдомоти зиддитеррористӣ ва пешбурди ҳамкорӣ мебошад.    

“Мо, мунтазир ва омодаи таъмини иштироки фаъоли намояндагони кишварҳо, созмонҳо ва дигар алоқамандон мебошем”,- таъкид намудаст Ҳотам Қурбонов.

Бояд гуфт, ки Душанбе барои бори сеюм аст, ки мизбони ҳамоиши сатҳи баланд дар мавзӯи мубориза бо терроризм бо иштироки намояндагони даҳҳо давлату созмонҳо мешавад. Қаблан низ дар Тоҷикистон, аз ҷумла 3 - 4 майи соли 2018 ва 16 - 17 майи 2019 конфронси сатҳи баланди мубориза бо терроризму экстремизм бо иштироки доираҳои васеи коршиносону мақомдорони давлатӣ баргузор гирдида буд.