Имрӯз, 5 май, Пешвои миллат, Президенти ҷумҳурӣ Эмомалӣ Раҳмон дар расми мавриди истифода қарор додани бинои нави истиқоматӣ барои кормандони сохторҳои қудратӣ ва мақомоти ҳифзи ҳуқуқу тартиботи мамлакат ва Кохи афсарон иштирок кард.

Бинои нави 15-ошёна дар маҳаллаи Зарафшони ноҳияи Синои шаҳри Душанбе ҷойгир буда, бо тарҳу услуби нави санъати меъморӣ бунёд шудааст. Он 108 манзили як ва дуҳуҷрагӣ дошта, баробари мавриди баҳрабардорӣ қарор гирифтан дар он зиёда аз 100 нафар корманди сохторҳои қудратии мамлакат ва мақомоти ҳифзи ҳуқуқу тартибот, аз ҷумла намояндагони вазоратҳои адлия, мудофиа, корҳои дохилӣ, Кумитаи давлатии амнияти миллӣ, Кумитаи ҳолатҳои фавқулодда ва мудофиаи гражданӣ бо манзили зист таъмин мешаванд.

Сарвари давлат аз нафарони соҳиби манзилҳои нав гардида даъват ба амал овард, ки содиқонаю софдилона ба Ватан-Модар хизмат карда, дар ободонию осоиштагии мамлакат, ҳифзи музаффариятҳои давлати соҳибистиқлол ва таъмини тартиботу оромии ҷомеа фаъолона иштирок намоянд.

Бо мақсади таъмини иҷрои дастуру супоришҳои Президенти ҷумҳурӣ барои ташкили ҷойҳои нави корӣ, фароҳамсозии зиндагии шоистаи хизматчиёни мақомоти қудратӣ, ҳамчунин риояи талаботи олии меъморию шаҳрсозӣ дар ошёнаи якуми бинои нав дармонгоҳи замонавӣ бунёд шудааст, ки дар оянда 43 нафар корманди соҳаи тиб дар он ба кори доимӣ фаро гирифта мешаванд.

Имрӯз дар шаҳри Душанбе, ҳамчунин бинои боҳашамати Кохи афсарони Вазорати мудофиа ба истифода дода шуд.

Зимни шиносоӣ бо бинои наву замонавии кох ба Сарвари давлат Эмомалӣ Раҳмон иттилоъ доданд, ки корҳои сохтмонӣ дар бино соли 2012 оғоз гардида буд. Иншооти мазкур дар доираи ҳамкориҳои мутақобилан судманди Тоҷикистону Чин бо харҷи 19 миллион доллари амрикоӣ маблағҳои кӯмаки бебозгашти Ҷумҳурии Мардумии Чин аз тарафи як ширкати сохтмонии ҳамин кишвар бунёд шудааст. Бино аз панҷ ошёна иборат буда, дар таҳхонаи он асосан толори васеи варзишӣ, ҳавзи шиноварӣ, ҳаммом, утоқҳои масҳи бадан ва дигар нуқтаҳои фароғатӣ ҷойгир аст. Дар қабати якум ошхонаи кушоду барҳавои муосир, утоқҳои кории муҷаҳҳаз бо лавозимоти зарурӣ, марказҳои гуногуни хизматрасонӣ, кошонаи ҳусн, мағозаи тиҷоратӣ, нуқтаи назорати камераҳои мушоҳидавӣ ва барои табобату расонидани ёрии аввалини тиббӣ як нуқтаи махсус бо тамоми шароит ба истифода дода шудааст.

Барои истироҳату фароғати афсарон ва меҳмонон ошхона ва меҳмонхонаи чинӣ бо 20 ҳуҷраи истиқоматӣ барои 40 нафар меҳмон дар ошёнаҳои дуюму сеюм, маҷлисгоҳ барои баргузории ҷаласаҳои гуногун, китобхонаҳои электронӣ ва утоқҳои алоҳидаи китобхонӣ мавҷуд аст. Дар ошёнаҳои чоруму панҷум бошад, маҷлисгоҳ бо 200 ҷойи нишаст, толор барои гузаронидани конфронсҳои матбуотӣ ва дигар марказҳои фароғатӣ ҷой дода шудаанд. Дар баробари дигар марказҳои хизматрасонию истироҳатӣ, инчунин дар ин бино 68 ҳуҷраи истиқоматӣ бо шароити лозима мавриди баҳрабардорӣ қарор дорад.

Президенти мамлакат Эмомалӣ Раҳмон зимни шиносоӣ бо шароити фаъолияту хизматрасонии Кохи афсарон ба кори сохтмончиён баҳои баланд дода, ба роҳбарияти Вазорати мудофиаи ҷумҳурӣ дастур дод, ки барои пешрафти кор аз имкониятҳои муҳайёкардаи Ҳукумати мамлакат самаранок истифода баранд.

Барои хизматрасонии сатҳи баланд дар Кохи афсарон 70 нафар занону бонувон ва мардони соҳибмаълумоту бомаҳорат ва донандагони забонҳои хориҷӣ бо ҷойи кори доимӣ таъмин гаштанд.

Баъди шиносоӣ бо Кохи афсарон дар толори маҷлисгоҳ Президенти мамлакат бо афсарону дигар кормандони Вазорати мудофиа суҳбат кард. Пешвои миллат ҳозиринро бо ифтитоҳи бинои истиқоматӣ ва маҷмааи Кохи афсарон табрику таҳният гуфта, аз таърихи бунёди артиши миллии кишвар ёдовар шуд. Изҳор дошт, ки ҳамаи пешравиҳои нерӯҳои мудофиавии кишвар бо шарофати соҳибистиқлолӣ насиби мардуми шарафманди тоҷик гардидааст. Таъкид шуд, ки имрӯзҳо роҳбарияти давлату Ҳукумати ҷумҳурӣ барои боло бурдани нуфузи ин ниҳод ва тарбияи насли ватандӯст тамоми тадбирҳоро амалӣ менамояд.

Афсарон зимни баромад ба Пешвои миллат, Президенти мамлакат Эмомалӣ Раҳмон барои ташаббусҳои созанда баҳри боло бурдани обрӯ ва нуфузи Артиши миллӣ дар минтақа ва ҷаҳон, таъмини беҳтарин шароити моддию техникӣ, тарбияи кадрҳои баландихтисос, инчунин дигар ғамхориҳо дар ҳаққи хизматчиёни низомӣ изҳори сипосу миннатдорӣ намуданд. Ваъда доданд, ки баҳри ҳифзи марзу буми Ватан содиқона хизмат мекунанд.