29 апрел дар маҷлиси Ҳукумати Ҷумҳурии Тоҷикистон, ки таҳти раёсати Сарвазири Ҷумҳурии Тоҷикистон Қоҳир Расулзода баргузор гардид, масъалаи таъсиси Корхонаи воҳиди давлатии “Маҷмааи варзишӣ”-и назди Донишгоҳи миллии Тоҷикистон баррасӣ гардид.

Дар ин бора АМИТ “Ховар” хабар дод.

Ба иттилои манбаъ дар маҷлис натиҷаҳои рушди иҷтимоию иқтисодии Ҷумҳурии Тоҷикистон дар семоҳаи аввали соли 2024 баррасӣ гардида, роҳбарони вазорату идораҳои давлатӣ оид ба ҷамъбасти фаъолияти бахшҳои муҳими иқтисоди миллӣ дар давраи ҳисоботӣ гузориш додаанд.

Ҳамчунин, лоиҳаҳои як қатор қонунҳои Ҷумҳурии Тоҷикистон ва чор хулосаи Ҳукумати Ҷумҳурии Тоҷикистон ба лоиҳаҳои як қатор қонунҳо зимни баргузории маҷлис муҳокима гардида, ба барои баррасӣ ба Маҷлиси намояндагони Маҷлиси Олии Ҷумҳурии Тоҷикистон ирсол карда шудааст.

Тавре гуфта мешавад қонуҳои баррасишуда қонунҳои Ҷумҳурии Тоҷикистон — “Дар бораи нишондиҳанда барои ҳисобҳо”, “Дар бораи Донишгоҳи миллии Тоҷикистон”, “Оид ба ворид намудани тағйир ба Кодекси мурофиаи ҳуқуқвайронкунии маъмурии Ҷумҳурии Тоҷикистон”, “Дар бораи ворид намудани илова ба Кодекси меҳнати Ҷумҳурии Тоҷикистон”, “Оид ба ворид намудани тағйиру иловаҳо ба Қонуни Ҷумҳурии Тоҷикистон “Дар бораи Ваколатдор оид ба ҳуқуқи инсон дар Ҷумҳурии Тоҷикистон”, “Оид ба ворид намудани тағйир ба Қонуни Ҷумҳурии Тоҷикистон “Дар бораи маориф” ва “Оид ба ворид намудани тағйиру иловаҳо ба Қонуни Ҷумҳурии Тоҷикистон “Дар бораи карантин ва муҳофизати растаниҳо” мебошанд.

Аъзои Ҳукумат ба лоиҳаҳои қонунҳои Ҷумҳурии Тоҷикистон “Дар бораи ворид намудани тағйироту иловаҳо ба Кодекси ҳуқуқвайронкунии маъмурии Ҷумҳурии Тоҷикистон”, “Дар бораи ворид намудани иловаҳо ба Кодекси мурофиаи ҳуқуқвайронкунии маъмурии Ҷумҳурии Тоҷикистон”, “Дар бораи ворид намудани тағйиру иловаҳо ба Кодекси мурофиаи иқтисодии Ҷумҳурии Тоҷикистон” ва “Оид ба ворид намудани тағйироту илова ба Қонуни Ҷумҳурии Тоҷикистон “Дар бораи суғуртаи мутақобила” хулоса додаанд.

Сарвазири мамлакат дар фароварди маҷлис аъзои Ҳукумат ва роҳбарони мақомоти иҷроияи ҳокимияти давлтии вилоятҳо ва шаҳру ноҳияҳоро барои иҷрои ҳатмию саривақтии дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои вусъати кишту кори баҳорӣ, пешгирӣ ва бартараф кардани офатҳои табиии вобаста ба селу обхезиҳо ва амалисозии тадбирҳои созанда ҷиҳати истиқболи сазовори ҷашни умумимиллӣ — 35-солагии Истиқлолияти давлатии Ҷумҳурии Тоҷикистон вазифадор кардааст.