Федератсияи Русия барои таъмини китобҳои дарсӣ бо забони русӣ дар муассисаҳои таълимии Ҷумҳурии Тоҷикистон 200 миллион рубли русӣ ҷудо мекунад.

Ин нукта зимни нишати мутбуотӣ аз ҷониби Раҳим Саидзода вазири маориф ва илми кишвар садо дод.

Ба гуфтаи Р. Саидзода айни замон аз ҷониби Тоҷикистон ва Федератсияи Русия гурӯҳи корӣ таъсис дода шудааст ва китобҳои нашршаванда бо ҷониби Тоҷикистон мутобиқ карда шуда, то охири моҳи феврал таҳия ва чопу дастрас мегарданд.

- Тибқи протоколе, ки бо ҷониби Русия баста шудааст, то 1-уми сентябр китобҳо ба муассисаҳои таълимӣ бояд дастрас шаванд, илова кард вазир.

Ба ҷуз ин, вазири маориф ва илм дар мавриди сатҳу сифати китобҳои дарсӣ ва камбудиҳои ҷойдошта изҳори назар карда, гуфт, ки вазорат муддати ду соли охир ба ин масъала ҷиддӣ машғул шуда, сифати китобҳоро беҳтар кардаистодааст.

- Чӣ гунае ки шумо медонед, китобҳо барои се сол пешниҳод мешавад. Шояд дар китобҳои солҳои пештар камбудиҳо буданд, вале мо онро бартараф карда истодаем. Дар назди Вазорат шурои таҳсилот дорем, ки ин масъалаҳоро баррасӣ мекунем,-гуфт вазир.

Ёдовар мешавем, ки Президенти Ҷумҳурии Тоҷикистон муҳтарам Эмомалӣ Раҳмон низ дар Паёми чанд сол қаблашон аз норасоии китобҳо дар муассисаҳои таҳсилоти ибтидоӣ ёдовар шуда, ба сохторҳои масъул супориш дода буданд, ки дар ин маврид чораҳои мушаххас андешанд.

Фарзонаи УМАРАЛӢ, “ҶТ”