Бо ибтикори Вазорати мудофиаи Ҷумҳурии Тоҷикистон дар якҷоягӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз санаи 30-уми октябр то 1-уми ноябр “Форуми ҷумҳуриявии хизматчиёни ҳарбии ҷавон ва ҷавонони синни даъватӣ” баргузор мегардад.

Мақсад аз баргузории ин Форум пеш аз ҳама тақвият бахшидан ба донишу малака ва таҷрибаи касбии хизматчиёни ҷавон ва бедор намудани ҳисси баланди ватандўстӣ дар замири ҷавонони синни даъватӣ мебошад. Зеро Асосгузори сулҳу ваҳдати миллӣ-Пешвои миллат, муҳтарам Эмомалӣ Раҳмон аз рўзҳои аввали соҳибистиқлолӣ ба ҷавонон ва сиёсати давлатии ҷавонон таваҷҷуҳи хосса зоҳир менамоянд ва бо ин муҳаббат, ғамхориву самимияти падарона меҳри қишри созандаи ҷомеаро ба Ватан ва эҳтиромашонро ба арзишҳову муқаддасоти миллӣ афзун мегардонанд.

Ёдовар мешавем, ки “Форуми ҷумҳуриявии хизматчиёни ҳарбии ҷавон ва ҷавонони синни даъватӣ” дар ҷумҳурӣ бори аввал гузаронида мешавад.