СИЁСАТ
Сешанбе 22 Сентябр 2020 12:18
1055
Дар ҷаласаи Шӯрои сарони давлатҳои узви Созмони Ҳамкориҳои Шанхай, ки имрӯз, 24 июн, дар пойтахти Узбекистон – шаҳри Тошканд доир гашт, Покистон ва Ҳиндустон низ ба узвияти ин созмони минтақавӣ пазируфта шуданд.

Ҳамоиши навбатӣ ба 15-умин солгарди таъсисёбии Созмони ҳамкории Шанхай рост омад. Ҷаласаи Шӯрои сарони давлатҳои аъзои СҲШ нахуст дар теъдоди маҳдуд ҷараён гирифт, ки дар он роҳбарони аввали Русия, Чин, Тоҷикистон, Қазоқистону Қирғизистон ва Узбекистон иштирок карданд. Дар ҷаласаи теъдоди васеъ бошад, сарони давлатҳои нозир - Ҷумҳурии Исломии Афғонистон, Ҷумҳурии Исломии Покистон, Ҳиндустон, Ҷумҳурии Исломии Эрон, Ҷумҳурии Белорус, Муғулистон ва намояндагони воломақоми як зумра созмонҳои байналмилалию минтақавӣ низ ҳамроҳ шуданд. Ба кишварҳои шарики муколама Туркия, Шри-Ланка, Ҷумҳурии Арманистон, Шоҳигарии Непал, Камбоҷа ва Ҷумҳурии Озарбойҷон шомил мебошанд.

Президенти Ҷумҳурии Тоҷикистон Эмомалӣ Раҳмон зимни суханронӣ иштирокчиёнро ба муносибати 15-умин солгарди таъсисёбии созмон ва сарони давлатҳои Покистону Ҳиндустонро барои шомил шудани кишварашон ба узвият табрику таҳният гуфт.

Зимни суханронӣ вобаста ба фаъолияти созмон ва таҳияву қабули барномаҳо Сарвари давлати Тоҷикистон Эмомалӣ Раҳмон изҳори умед кард, ки татбиқи Стратегияи рушди СҲШ то соли 2025 барои дурнамои рушди созмон заминаи воқеӣ мегузорад ва Тоҷикистон қабули нақшаи амалро оид ба татбиқи ин стратегия давоми 5 соли оянда ҷонибдорӣ мекунад. Барнома имкон медиҳад, ки кишварҳои аъзо ҳамкориро ба сатҳу сифати нав бароварда, нақши созмонро дар ҳалли масъалаҳои минтақавию ҷаҳонӣ боло баранд.

Аз ҷониби Президенти Тоҷикистон Эмомалӣ Раҳмон дар робита ба нақшаи амали кишварҳои аъзои созмон пешниҳодҳои мушаххас ба миён гузошта шуд. Тақвияти муборизаи дастаҷамъона бар зидди хатарҳои ҷаҳони муосир ба хотири таъмини амнияту субот дар минтақаву ҷаҳон ва тезонидани раванди таъсиси бонк ва Фонди рушди Созмони ҳамкории Шанхай баҳри таҳкими муносибатҳои иқтисодӣ, таҳияву татбиқи лоиҳаҳои инвеститсионии дорои аҳамияти минтақавӣ, аз ҷумлаи онҳо мебошад. Президенти Ҷумҳурии Тоҷикистон Эмомалӣ Раҳмон инчунин ҷонибдории кишварро барои ҳарчи зудтар қабул шудани Конвенсияи Созмони Милали Муттаҳид оид ба мубориза бо терроризми байналхалқӣ баён намуд.

Эмомалӣ Раҳмон оид ба дигар паҳлуҳои ҳамкории кишварҳои аъзо дар соҳаҳои иқтисодӣ, энергетика, нақлиёту транзит ва фарҳангию гуманитарӣ  андешаронӣ карда, бори дигар мавқеи устувори Тоҷикистонро  барои таҳкими он муайян кард.

Пас аз анҷоми суханрониҳо аз ҷониби сарони давлатҳои аъзо як зумра санадҳо ба имзо расид.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Сентябр 2020 c.