Мусоҳибаи Такер Карлсон бо Владимир Путин, президенти Федератсияи Русия дар фазои расонаҳои ҷаҳонӣ таваҷҷуҳи ҷиддиро ба худ ҷалб кард. Танҳо давоми 3 шабонарӯз ин суҳбатро дар Ютуб 170 млн. нафар аз саҳифаи худи Такер Карлсон тамошо кардаанд, ки ин ҳадди рекордии суҳбати як сиёсатмадор дар торномаи интернетӣ мебошад.

Матбуоти ғарбӣ ба таври умум ба ин мусоҳиба бо хусумат вокуниш нишон дода, Карлсонро “аҳмақ”-е номиданд, ки манфиатҳои Русияро пиёда мекунад.

Шаби 9 феврал рӯзноманигори амрикоӣ Такер Карлсон дар вебсайти худ ва сипас дар платформаи X (собиқ Твиттер) мусоҳибаи ваъдашуда бо президенти Русия Владимир Путинро нашр кард. Рӯзноманигор дар авоили моҳи феврал ба Маскав омад, то бо раҳбари аввали Русия суҳбат кунад. Хоҳиши Карлсон барои гуфтугӯ бо Путин мавҷи интиқодҳои ҳамтоёни ғарбӣ ва чеҳраҳои сиёсиро ба бор овард.

Мусоҳибаи Карлсон бо Путин каме бештар аз ду соат давом мекунад. Муколама асосан ба баррасии масоили марбут ба низоъ дар Украина ва равобити Русияву Амрико дахл дорад. Дар қисми муҳими ҷадвали вақт Путин сабабҳои бӯҳрони Украина ва тасмими Русия дар бораи оғози амалиёти вижаи низомӣ дар моҳи феврали соли 2022-ро шарҳ медиҳад.

Интишори навор сару садоҳои ҷиддиеро ба бор овард - танҳо дар платформаи X, шумори тамошобинони ин мусоҳиба дар ҳашт соати пас аз нашр аз 60 миллион гузашт. Аммо на ҳама расонаҳои амрикоӣ ба ин навор, ки дар вақти маҳаллӣ пахш шудааст, таваҷҷуҳ карданд.

Портали олмонии “Bild” ба ошуфтагӣ рӯзноманигори амрикоиро аҳмақи бемаҳорате меномад, ки аз ибтидои суҳбат риштаи мусоҳибаро аз даст дод ва давоми ду соат танҳо Путин баромад кард.

Ба навиштаи “The Wall Street Journal” ин мусоҳиба ба Путин имкон дод, ки нуфузи худро дар хона афзоиш диҳад ва нишон диҳад, ки ӯро ҳанӯз дар Ғарб шунидан мумкин аст.

Ҳамзамон, “The Washington Post” бештар ба “сукут”-и Карлсон таваҷҷуҳ намуда, бовар дорад, ки раисҷумҳури Русия тавонист, имкони истифода аз иқдомоти Маскав дар Украинаро ҳамчун дифоъ аз худ дар заминаи муҳосираи НАТО муаррифӣ кунад. Аз нигоҳи нашрия, рӯзноманигори амрикоӣ ба ҷои саволҳои фаврӣ, кӯшиш кард, ки Путинро ба баррасии назарияҳои тавтиъа, аз ҷумла мавҷудияти “давлати амиқ” дар Иёлоти Муттаҳида водор кунад.

Таҳлилгарони телевизиони CNN бошанд, ин мусоҳибаро дар пасманзари нармии журналисти амрикоӣ “ғалабаи таблиғотӣ”-и Путин номидаанд. Ба гуфтаи ин шабакаи телевизионӣ, солҳои ахир Карлсон аз интиқод аз ҳукумати Русия даст кашида буд ва дар ин замина тамоми ҳизби ҷумҳурихоҳро бо худ кашид.

Аммо котиби матбуотии раисҷумҳури Русия Дмитрий Песков дар робита ба вокуниши тунди рӯзноманигорони аврупоиву амрикоӣ сухан гуфта, рафтори онҳоро ҳасади касбӣ номид.
“Барои Путин чизи асосӣ вокуниши русҳост, аммо муҳим он аст, ки шумораи бештари мардум дар Ғарб бо мусоҳиба шинос шаванд. Рӯзноманигороне, ки Карлсонро маҳкум мекунанд, аслан аз бемаҳоратии худ нигаронанд ва ба ӯ ҳасади касбӣ мебаранд”, - гуфт Дмитрий Песков.

Песков афзуд, ки ахиран маъмурияти президент аз бузургтарин расонаҳои ҷаҳон чанд дархост барои мусоҳиба бо сарвари давлатро гирифтааст, аммо Путин танҳо ба ин мусоҳиба розӣ шуд.
Сиёсатшинос Евгений Минченко бар ин назар аст, ки расонаҳои умдаи ғарбӣ ин суҳбатро нодида гирифта, онро ҳадди ақал инъикос кардаанд.

“Дар ин ҷо ғояи асосӣ танқиди Такер аз ҷониби ҳамкасбонаш дар он аст, ки ӯ аз оғоз натавонист риштаи суҳбатро ба даст гирад ва давоми ду соат суҳбатро Путин идора кард. Дар натиҷа, Ғарб ба танқиди Карлсон барои додани платформа ва мулоимии нисбии ӯ ба Путин бисёртар таваҷҷуҳ кард”, - шарҳ додааст коршинос.

Яҳё МАҲМАДНАБИЕВ, “ҶТ”