Ҷумҳурии Тоҷикистон зери сиёсати дурбинона ва хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун давлати мустақил ва узви комилҳуқуқи ҷомеаи ҷаҳонӣ дар шароити ҷаҳонишавӣ ва бархурди тамаддунҳо дар роҳи расидан ба чаҳор ҳадафи стратегии хеш қадамҳои устувор мегузорад.

Дар зарфи 29 соли соҳибистиқлолӣ мо-халқи тоҷик тавонистем, бо шарофати меҳнати софдилона дар роҳи таъмини рушди сиёсиву иқтисодӣ ва иҷтимоиву фарҳангии кишвар ба натиҷаҳои назаррас ноил гардем ва ҳамаи ин корҳоро ба хотири таҳкими пояҳои давлатдории миллии хеш анҷом додем. Пеш аз ҳама озодиву истиқлолият ва ваҳдати комили миллӣ ин орзуи ҳазорсолаи миллати тамаддунофари тоҷикон буд, ки насиби мо, насли хушбахт гаштааст.

Мутаассифона, имрӯз нотавонбинони миллат, аз қабили ТЭТ ҲНИ ин ҳама пешравии кишвари моро намехоҳанд. Барангехтани кинаю адоват ва низоъ дар миёни мардум роҳи пешгирифтаи аъзои ТЭТ ҲНИ буда, танҳо ҳамин амалҳои ғайриинсонӣ барояшон роҳат мебахшад. Ин тоифа одамон барномаи дигар, ки барои манфиати мардуми кишвар бошад, надоранд ва манфиатҳои шахсии худро болотар аз ҳамаи арзишу ормонҳои миллӣ медонанд.

Филми мустанади “Хиёнат” ба кирдорҳои аз тарафи роҳбарият ва аъзои ТТЭ ҲНИ анҷомшуда бахшида шудааст. Дар филми мазкур гуфта мешавад, ки онҳо тавассути роҳандозии ақидаҳои диниву сиёсии ҳизби мазкур, ки аз таълимоти ташкилоти дигари байналмилалии террористии “Ихвон-ул-муслимин” сарчашма мегирад, зидди давлату миллати хеш қиём карданд. Дар ҳамин асос аз байни мардуми тоҷик ҷавонони зиёдеро гумроҳ намуданд ва онҳо ба ватани худ хиёнат карда, марзу буми кишварро ноором сохтанд. Ҳамзамон дар ин филм нигоштаҳои бардурӯғу қиссаҳои бофтаи хаёлии ин нафарони дасисабоз, ки дардашон бедаво аст, хело ҳам мӯшикофона бо далелҳои амиқ ва возеҳу равшан намоиш дода шудааст.

Филми мустанади “Хиёнат” ба қисматҳои алоҳида ҷудо шудааст, ки фаҳмиши ҳодисаҳои дар он тасвиршударо осонтар мегардонад. Агар қисмати якум оид ба амалҳои террористие, ки аъзо ва ҳаммаслакони ТТЭ ҲНИ бо роҳбарии Мухиддин Кабирӣ ва бо дасти Абдуҳалим Назарзода дар моҳи сентябри соли 2015 анҷом дода шуда буд, маълумот диҳад, дар қисмати дуюми филм дар бораи фаъолияти тахрибкоронаи ТТЭ ҲНИ дар хориҷи кишвар маълумот дода мешавад. Ба ҳамагон маълум аст, ки дар қисмати сеюми филм дар бораи дастгоҳҳои таблиғотии ТТЭ ҲНИ ва сомонаҳое, ки ба ин ташкилот тааллуқ доранд, маълумоти дақиқ дода шудааст. Дар қисмати чоруми филм маълумот аз забони шоҳидон оварда шудааст. Тамошои ин филм моро ҳушдор медиҳад, ки аз таърихи миллати худ сабақ омӯзем ва ҳеҷ гоҳ фирефтаи доми хоинони ватанбезор нагардем.

Барои боз ҳам бо далелҳои муътамад ифшо намудани амалҳои разилонаи ин ташкилоти экстремистию террористии ҲНИ чанде пеш тавассути шабакаҳои телевизионӣ қисматҳои алоҳидаи филми мустанади “Хиёнат” намоиш дода шуд.

Мо-ҷавонон аз таърих нобасомониҳои солҳои навадум, оқибатҳои даҳшатнок, зарбаҳои ҷонкоҳи ҷанги таҳмилии шаҳрвандӣ ва фоҷиаи бародаркуширо хуб медонем. Аз ин рӯ, бояд ба қадри сулҳу субот, ваҳдату ягонагӣ ва Истиқлолияти давлатӣ расем.

Хулоса, манзара ва мафҳумҳои дар филми “Хиёнат” истифодашуда, моро ҳушдор менамояд, ки аз таърихи миллати худ сабақ омӯзем ва ҳеҷ гоҳ фирефтаи доми хоинони ватанбезор нашуда, барои боз ҳам сарсабзу ободтар гардидани ватани азизамон ҷаҳд намоем, то ба наслҳои оянда як мулки обод ва сарзамини шукуфонро ба мерос гузорем.