Низомиддин Зоҳидӣ сафири Фавқулода ва Мухтори Ҷумҳурии Тоҷикистон дар мулоқот бо раиси вилояти Ҳамадони Ҷумҳурии Исломии Эрон Алиризо Қосимӣ Фарзод зарурати фаъол гардонидани робитаҳо миёни вилоятҳои Хатлони Тоҷикистон ва Ҳамадони Эронро таъкид намуданд.

Дар ин бора Вазорати корҳои хориҷии кишвар иттилоъ дода, менависад, ки ин гуфтугузор 16-17 августи соли ҷорӣ сурат гирифтааст.

- Зимни мулоқот ҷонибҳо бо изҳори қаноатмандӣ аз густариши ҳамкориҳо миёни Тоҷикистон ва Эрон зарурати фаъол гардонидани робитаҳои гуногунҷанба миёни вилоятҳои ду кишвар, аз ҷумла Хатлони Тоҷикистон ва Ҳамадони Эронро таъкид карданд,-омадааст дар хабар.
Инчунин Алиризо Қосимӣ Фарзод зарфият ва тавонмандиҳои вилояти Ҳамадонро дар соҳаҳои саноат, кишоварзӣ, металлургия, тиб, фарҳанг ва сайёҳӣ таъкид карда, омодагии фаъолони иқтисодии вилоятро барои табодули таҷриба миёни мутахассисон, баргузории чорабиниҳои муштараки иқтисодиву тиҷоратӣ ва густариши ҳамкориҳои дуҷониба изҳор намудааст.

Гуфта мешавад, ки дар рафти вохӯрӣ масъалаҳои фаъол намудани робитаҳои бародаршаҳрӣ миёни Ҳамадон ва Кӯлоб баррасӣ гардида, шахсияти ориф ва мутафаккири бузург Мирсаид Алии Ҳамадонӣ ба унвони ҳалқаи пайванди ин ду шаҳри бостонӣ таъкид гардид.

Фарзонаи УМАРАЛӢ, “ҶТ”