13 март бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ташкилоти ҷамъиятии “Пайравони Пешвои миллат” дар Академияи идоракунии давлатии назди Президенти Ҷумҳурии Тоҷикистон аз ҷониби маҳфили “Сиёсатшиносони ҷавон” нахустмаҳфили иттилоотию маърифатӣ таҳти унвони “Давлатдории миллӣ ва нақши ҳаётии он дар сарнавишти таърихии тоҷикон” баргузор гардид.

Дар ҳамоиш Сураҷ Чоршанбезода, муовини раиси КҶВ, Абдуллоҳи Раҳнамо, сиёсатшинос, Раҷабзода Зарнигор, муовини раиси ташкилоти ҷамъиятии “Пайравони Пешвои миллат” ва ҷавонону аъзоёни фаъоли маҳфил иштирок ва суханронӣ намуданд.

Сараввал Сураҷ Чоршанбезода баромад намуда, қайд кард, ки ҳадаф аз таъсиси маҳфили “Сиёсатшиносони ҷавон” ва ташкили чунин чорабинии иттилоотию маърифатӣ аз он иборат аст, ки ҷавонони ватандӯст дастгирӣ ёфта, бо воситаи ин гуна чорабиниҳо дониши сиёсии онҳо баланд гардонида шавад.

Сипас, сиёсатшинос Абдуллоҳи Раҳнамо баромад карда гуфт, ки бедории андешаи миллӣ омили муҳими таҳкимбахшандаи фарҳанг, забон ва арзишҳои таърихан ташаккулёфтае мебошанд, ки ҷомеаро барои муваффақ гаштан дар раванди давлатсозии миллӣ дилпур месозанд.

Ҳамин гуна чанд иштирокчии дигари маҳфил суханронӣ карда, сипас миёни иштирокдорон суолу ҷавоб сурат гирифт.

Дар қисмати хотимавӣ аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба меҳмонони маҳфил Сипоснома ва туҳфаҳои хотиравӣ тақдим гардид.