СИЁСАТ
Якшанбе 11 Апрел 2021 09:45
1633

Баъд аз анҷоми сафари корӣ ва ифтитоҳи як қатор иншоот дар ноҳияи Муъминобод сафари кории Пешвои миллат, Президенти ҷумҳурӣ, муҳтарам Эмомалӣ Раҳмон дар ноҳияи Восеъ идома ёфт.



Сарвари давлатро роҳбарият ва сокинони ноҳия дар Ҷамоати деҳоти ба номи Абӯабдуллоҳи Рӯдакӣ бо шодиву нишоти беандоза ва эҳтироми хос истиқбол гирифтанд.

Баъдан Пешвои миллат, муҳтарам Эмомалӣ Раҳмон дар маросими ифтитоҳи навбати аввали роҳи мошингарди Восеъ-Ховалинг иштирок намуд. Масофаи роҳи мошингарди Восеъ - Ховалинг 88 километрро ташкил дода, бо харҷи 600 миллион сомонӣ бунёд гардидааст. Корҳои сохтмонии навбати дуюми роҳи мазкур моҳҳои наздик шуруъ гардида, асфалтпӯш кардан, чароғонкунӣ, сохтмони роҳҳои пиёдагард ва дигар иншооти ёрирасон саривақт ва дар муҳлати муайянгардида ба анҷом расонида шуда, роҳи мазкур ба талаботи меъёрҳои байналмилалӣ мутобиқ карда мешавад.



Дар Ҷамоати деҳоти ба номи Абӯабдуллоҳи Рӯдакӣ Президенти мамлакат бо дастовардҳои хоҷагии халқи ноҳияи Восеъ ва расму оинҳои миллию ҳунарҳои мардумӣ, ки аз ҷониби хоҷагидорон ва ҳунармандону кадбонуҳо дар намоишгоҳ ба маъраз гузошта шуда буд, шинос шуд.

Бо тарзи омода кардани маводи ғизоӣ, аз ҷумла нонҳои пухтаи хушлаззати кадбонуҳо, таъомҳои миллӣ, ҳунарҳои мардумӣ, ки анъанаву сунатҳои неку қадимаи миллати тоҷикро муаррифӣ мекарданд, Президенти мамлакат таваҷҷуҳи хос зоҳир намуданд ва ба маҳсули эҷоди ҳунармандон баҳои баланд доданд.



Дар намоишгоҳи дастовардҳои хоҷагидорон анвои гуногуни меваҳои шаҳдбор, аз қабили себу нок, анор, ангур ва дигар меваҷот пешниҳод гардида, дарак аз файзу баракат ва фаровонии дастурхони аҳли заҳмат медод.

Маҳсули меҳнати занбӯри асалпарварон дар намоишгоҳ ба маъраз гузошта шуда, имсол аҳли заҳмат аз оилаҳои занбӯри асал 35,6 тонна асал гирифтаанд. Иттилоъ дода шуд, ки дар ноҳияи Восеъ шумораи оилаҳои занбӯри асал сол то сол зиёд шуда, дар баробари таъмини бозорҳои дохилӣ содироти он ба хориҷи кишвар ба роҳ монда мешавад.

Зимни шиносоӣ бо намоиши дастовардҳои хоҷагии халқи ноҳияи Восеъ Сарвари давлат ба деҳқонон барои истифодаи босамари замин ва интихоби тухмиҳои серҳосил дастуру маслиҳат дода, таъкид кард, ки ҷиҳати дар оянда таъмин кардани рушди бахшҳои соҳаҳои кишоварзӣ, аз ҷумла ғаллакорӣ, боғдорӣ, сабзавоткорӣ, занбӯри асалпарварӣ, чорводорӣ ва парандапарварӣ аз шароиту имкониятҳои мавҷуда истифода намоянд.

Истеҳсоли картошка, пиёз, сабзавоти тару тозаи кишоварзӣ, аз ҷумла помидору бодиринг, лаблабу, шалғам, полезиҳо тарбузу харбуза, каду ва дигар номгӯйи маҳсулоти кишоварзӣ дар ноҳияи Восеъ дар ҳама шаклҳои хоҷагидорӣ зиёд гардида, дар намоишгоҳ аҳли заҳмат дастовардҳои назарраси хешро ба маъраз гузоштанд.



Дар ҳамин ҷо хатнасури 50 нафар кӯдак аз оилаҳои ниёзманд ба таври дастҷамъона гузаронида шуда, ба онҳо тӯҳфаҳои Пешвои миллат, муҳтарам Эмомалӣ Раҳмон тақдим гардид.



Анъанаҳои мардумӣ дар «Бозори ҳунар» бо пешниҳоди чакандӯзиву қуроқдӯзӣ, намадбофӣ, тӯйи домодиву арусӣ ва дигар маросимҳое, ки мардуми соҳибтамаддуни тоҷик ва дорои таърихи бою пурғановат дар гузашта доир мекарданд, макони намоишгоҳро бошукуҳу диданӣ гардонид.

Сипас, дар деҳаи Меҳнатободи Ҷамоати ба номи Абӯабдуллоҳи Рӯдакӣ варзишгоҳ ва майдони корти теннис мавриди баҳрабардорӣ қарор гирифт.



Нахуст Сарвари давлат Эмомалӣ Раҳмон бо шароити муҳайёгашта дар майдони корти теннис, ки бо маблағгузории соҳибкори ватанӣ Авазхон Кабиров бунёд гардидааст, дидан карда, барои амалӣ кардани иқдоми мазкур ба ин соҳибкори ташаббускор арзи сипосу миннатдорӣ намуд.

Гуфта шуд, ки иншооти мазкур дар муҳлати кӯтоҳ бо харҷи 320 ҳазор сомонӣ сохта шуда, дар он барои машғул шудани наврасону ҷавонон ба намудҳои гуногуни варзиш шароити зарурӣ муҳайё гардидааст.



Дар расми ба истифода додани варзишгоҳ бо 5 ҳазору 260 ҷойи нишаст ба Пешвои миллат иттилоъ доданд, ки ин иншооти муҳташами варзишӣ низ аз тарафи соҳибкори ватанӣ Авазхон Кабиров бо харҷи 1,2 миллион сомонӣ сохта шуда, барои баргузории мусобиқаҳои сатҳи ҷумҳуриявию байналимлалӣ оид ба футбол ва машқу тамрини наврасону ҷавонон мувофиқ мебошад. Бо қаноатмандӣ таъкид гардид, ки минбаъд дар ин ҷо мусобиқаҳои сатҳи баланд аз рӯи намудҳои гуногуни варзиш доир мешаванд ва ҳамзамон ҷавонону наврасони ноҳия ба машқу тамрин машғул шуда, малакаи варзишии худро баланд мебардоранд.

Дар рӯзи аввали ба истифода додани варзишгоҳ даври ниҳоии мусобиқаи вилоятии “Тӯби чармин” оид ба футбол миёни дастаҳои ноҳияҳои Восеъ ва Фархор доир гардид, ки Сарвари давлат Эмомалӣ Раҳмон ва ҳайати ҳамроҳи ӯ нахустин тамошобини ин чорабинии варзишӣ буданд.

Пешвои миллат Эмомалӣ Раҳмон ифтитоҳи варзишгоҳи боҳашаматро пеш аз ҳама барои рушди варзиш ва солимии ҷомеа дар ноҳия ва минтақа муҳим арзёбӣ карда, дар рӯзҳои таҷлил аз 25-умин солгарди Истиқлолияти давлатии Ҷумҳурии Тоҷикистон тӯҳфаи арзанда маънидод намуд.



Дар деҳаи Меҳнатобод, ҳамзамон беморхонаи №3 ва Маркази саломатии деҳа ба истифода дода шуданд.

Иттилоъ дода шуд, ки беморхонаи №3-и деҳаи Меҳнатободи ноҳияи Восеъ дорои шароити муосири ташхису табобат буда, бо фарогирии 50 кат барои беморон аз ҷониби хоҷагии деҳқонии “Файзи Сайид” бо харҷи 1 миллиону 700 ҳазор сомонӣ сохта шудааст. Беморхона бо сармоягузории Фонди хайрияи Араб бо пешрафтатарин таҷҳизоти ташхису табобат, аз қабили ултросадо, дастгоҳҳои муосири физиотерапия, сабти барқии дил ва ғайра таъмин гардида, ин муассисаи тандурустӣ аз нигоҳи имконият ва шароити тиббӣ дар ноҳия назир надорад.

Сарвари давлат ба табибони беморхона дастур дод, ки дар вақти ташхис ва табобати беморон масъулияти бештар дошта бошанд ва пеш аз ҳама баҳри беҳдошти солимии ҷомеа саҳми арзанда гузоранд.



Гуфта шуд, ки беморхона дорои чор шуъба, аз қабили таваллуд, ҷарроҳӣ, калонсолон ва кӯдакона иборат буда, табибони ин муассисаи тандурустӣ дар навбати худ ба Сарвари давлат Эмомалӣ Раҳмон ваъда доданд, ки хизматраоснии тиббиро дар сатҳи зарурӣ роҳандозӣ хоҳанд кард.

Бо мавриди баҳрабардорӣ қарор гирифтани беморхона 150 нафар, аз ҷумла 14 нафар табиби дараҷаи олӣ, 50 нафар корманди миёнаи тиб ва 30 нафар корманди хурди соҳа бо ҷойи кору маоши хуб таъмин гардиданд.

Дорухонаи табиат, ки аз гулу гиёҳҳои шифобахши Тоҷикистони биҳиштосо дар он маводи доруворӣ тайёр карда мешавад, дар беморхона ҷойгоҳи махсус дорад.

Зимни ифтитоҳи Маркази саломатии Ҷамоати деҳоти ба номи Абӯабдуллоҳи Рӯдакӣ ба Сарвари давлат Эмомалӣ Раҳмон иттилоъ дода шуд, ки ин муассисаи тандурустӣ бо маблағгузории давлати Ҷопон ва Фонди хайрияи Араб, ки арзиши лоиҳа 826 ҳазор сомониро ташкил медиҳад, сохта шудааст.

Ба гуфти роҳбари Фонди хайрияи Араб дар Тоҷикистон таҷҳизоти ҳозиразамони соҳа, аз қабили лор комбайн, систоскоп, бронхоскоп, гастроскоп, колпоскоп, дастгоҳҳои ултрасадо, дастгоҳҳои дандонпизишкӣ ва сабти барқии дил имкон медиҳад, ки кори табибон дар самти муайяну мушаххас намудани бемориҳо осон гардад.

Ҷараёни қабул ва барои ташхису маслиҳат ба табибон роҳхат додан, дар маркази саломатӣ ба воситаи барномаи махсуси компютерӣ сурат мегирад, ки ин ҳам дар ноҳияи Восеи вилояти Хатлон навоварии калон аст.

Ҳамзамон маркази саломатӣ дорои озмоишгоҳҳо, маркази таълимӣ барои корҳои амалӣ, утоқҳои муоина ва муолиҷаи гулу, гӯшу бинӣ, дандон, узвҳои нафаскашӣ, меъдаю рӯда, бемориҳои занона, урологӣ, чашм, дил ва ғайра мебошад.



Дар деҳаи Меҳнатобод Сарвари давлат дар вазъияти тантанавӣ бо буридани лентаи рамзӣ Муассисаи таҳсилоти миёнаи умумии рақами 51-ро мавриди баҳрабардорӣ қарор дод.

Бинои муассиса аз ду ошёна иборат буда, барои 340 нафар хонанда дар як баст пешбинӣ гардидааст. Дар ду ошёнаи мактаб 13 синфхонаи барҳавои фаннӣ, аз ҷумлаи химия, физика, математика, омодагии ибтидоии ҳарбӣ, ҳунаромӯзӣ ва утоқҳои корӣ барои омӯзгорон мавҷуд аст.

Тавре аён гардид, ҳамаи синфхонаҳои ин мактаб бо пешрафтатарин технология ва воситаҳои илмомӯзии муосир, ба монанди тахтаҳои электронӣ ва компютерҳо муҷаҳҳаз карда шуда, ҳамчунин дорои ошхона ва дигар иншооти ёрирасон мебошад. Аз ҷумла дар ин ҷо барои таъмини мактаб бо гармӣ як буғхона, ки бо истифода аз ангишт фаъолият хоҳад кард, сохта шудааст.

Таъкид гардид, ки муассисаи мазкур бо назардошти ояндабинӣ таҳия гардида, оянда дар ин ҷо се бинои дигар, иборат аз толори варзишӣ, ошхона, толори маҷлис, китобхона ва 8 синфхона сохта мешавад.

Лозим ба ёдоварист, ки дар соли 1998 бо сабаби баланд шудани оби дарёи Ёхсӯ ва омадни сел бинои пешинаи мактаби рақами 51 пурра хароб гардид ва солҳои зиёд хонандагон дар шароити на он қадар хуб таҳсил доштанд.



Дар Ҷамоати деҳоти ба номи Абӯабдуллоҳи Рӯдакӣ Президенти кишвар Эмомалӣ Раҳмон бо роҳбарону фаъолон ва сокинони ноҳияи Восеъ мулоқот кард.

Бо қаноатмандӣ зикр шуд, ки дар зарфи бисту панҷ соли соҳибихтиёрӣ мардуми заҳматпешаи ноҳияи Восеъ бо истифода аз шароиту имкониятҳои мусоид, аз ҷумла захираҳои бойи обу сарватҳои табиӣ ба дастовардҳои назаррас ноил шудаанд ва бунёди инфрасохтори иҷтимоӣ, таъмиру азнавсозии роҳҳо, барқарорсозии мавзеъҳои таърихӣ ва ободии гулгашту хиёбонҳо симои ноҳияро куллан дигаргун намуда, ҳоло ноҳия ба як мавзеи хеле ободу зебо табдил ёфтааст.

Сарвари давлат таъкид дошт, ки бо мақсади пешрафти иқтисодиву иҷтимоии ноҳия давоми солҳои соҳибистиқлолӣ аз ҳисоби буҷети давлат қариб 700 миллион сомонӣ равона гардидааст ва ҷиҳати беҳдошти вазъи иҷтимоӣ ва баланд бардоштани сатҳу сифати хизматрасонӣ ба аҳолӣ барои бунёди иншооти соҳаи иҷтимоӣ беш аз 330 миллион сомонӣ равона шуд. Ҳамзамон бо ин, дар асоси барномаҳои давлатии рушд дар ноҳия то соли 2020 татбиқи 370 лоиҳа ба маблағи умумии 520 миллион сомонӣ пешбинӣ гардидааст.



Сарвари давлат барои дастгирии сиёсати иҷтимоии Ҳукумати мамлакат ба ҳамаи соҳибкорони бонангу номус ва шахсони саховатпеша, ки дар баробари бунёди иншооти гуногун ва обод намудани як гӯшаи диёр, инчунин, барои ҳамватанони хеш ҷойҳои нави корӣ муҳайё карда, дар амри хайри дастгирии шахсони эҳтиёҷманд кӯшиш мекунанд, миннатдории самимии худро изҳор намуд.

Баъд аз анҷоми суханронии Пешвои миллат, муҳтарам Эмомалӣ Раҳмон сокинони ноҳия баромад карда, ба роҳбарияти давлату Ҳукумати мамлакат барои талошҳои шабонарӯзӣ баҳри ободии диёр ва осудагии мардуми кишвар изҳори сипосу миннатдорӣ карданд. Изҳор доштанд, ки бо шарофати сулҳу ваҳдати пойдор ва сиёсати пешгирифтаи Президенти мамлакат ҳамаи бахшҳо рушд карда, шароити мусоиди кору зиндагӣ ва таҳсил фароҳам омадааст.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.