Дар соли сипаригардида аз ҷониби Суди Олии мамлакат, Суди ВМКБ, судҳои вилоятҳои Суғду Хатлон, шаҳри Душанбе, судҳои ҳарбӣ ва шаҳру навоҳии ҷумҳурӣ дар маҷмуъ 1 милиону 346 ҳазор парванда ва дархосту пешниҳодҳо мавриди баррасӣ ва ҳаллу иҷро қарор дода шуд, ки нисбати ҳамин давраи соли гузашта 134 ҳазор адад кам мебошад. Ин матлабро Шермуҳаммад Шоҳиён, раиси Суди Олии мамлакат зимни нишасти матбуотӣ санаи 8 феврали соли ҷорӣ иброз намуд.

Гуфта шуд, ки дар марҳилаи кассатсионию назоратии судҳои болоӣ аз рӯи шикояту эътирозҳо 7730 адад санадҳои судӣ мавриди санҷишу баррасӣ қарор гирифтанд.
Вобаста ба риоя накардани Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” соли гузашта 609 парвандаҳои ҳуқуқвайронукунии маъмурӣ баррасӣ гардида, нисбати 600 шахс ба маблағи умумии 2 миллиону 599 ҳазор сомонӣ ҷарима татбиқ шуд.

Тавре Шермуҳаммад Шоҳиён, раиси Суди Олии Ҷумҳурии Тоҷикистон иброз намуд, бо мақсади беҳтар намудани кори мақомоти судӣ дар соли 2021 ва аз байн бурдани камбудию норасоиҳои дар фаъолияти судяҳо ҷойдошта раисони коллегияҳои судии Суди Олӣ, раисони судҳои вилоят ва шаҳру ноҳияҳо вазифадор карда шуданд, ки назоратро аз болои фаъолияти судҳои поёнӣ пурзӯр намоянд.

“Коллегияи ҳарбии Суди Олӣ ва судҳои ҳарбии гарнизонҳо вазифадор карда шуданд, ки тарғибу ташвиқи риояи қонунҳо, оинномаҳои хизматӣ, интизоми ҳарбӣ ва тартиботи ҳуқуқиро дар қисмҳои ҳарбӣ тақвият бахшида, бо мақсади пешгирии содиршавии ҷинояту қонуншиканиҳо аз ҷониби хизматчиёни ҳарбӣ корҳои фаҳмондадиҳиро пурзӯр намоянд,-гуфт, Шермуҳаммад Шоҳиён.