Аз Ҷумҳурии Тоҷикистон дар 6 моҳи аввали соли ҷорӣ 126 нафар барои кор ба Британияи Кабир рафтаанд. Дар ин бора Ширин Амонзода, вазири меҳнат, муҳоҷират ва шуғли аҳолии Тоҷикистон зимни нишасти хабарӣ иттилоъ дод.

Ӯ афзуд, ки ин теъдод аллакай барои кор сафарбар гардида, ҳудуди 200 тоҷикистонии дигар ҳоло дар интизори раводид мебошанд. Ба гуфтаи вазир, муҳоҷирони тоҷик асосан дар корҳои мавсимии гармхонаҳо кор мекунанд.

Вазорати меҳнат, муҳоҷират ва шуғлии аҳолии Тоҷикистон мегӯяд, феълан барои роҳандозии ҳамкорӣ дар бахши муҳоҷирати меҳнатӣ бо Корея, Туркия ва Кувейт корбарӣ ҷараён дорад.

Қаблан дар вазорати мазкур хабар дода буданд, ки ширкати бритониёӣ шаҳрвандони Тоҷикистонро барои кори мавсимӣ ба ин кишвар даъват кардааст ва то ҳол ҳудуди ҳазор нафар дархост додаанд, вале баъди имтиҳони забони англисӣ ҳудуди 250 нафари онҳо (ҳамон вақт) пазируфта ва интизори даъвати кор ҳастанд.