Дар шаш моҳи аввали соли равон дар Ҷумҳурии Тоҷикистон 203 ҳолати додани таълимоти ғайриқонунии динӣ ошкор гардидааст.

Дар ин бора Юсуф Раҳмон прокурори генералии Ҷумҳурии Тоҷикистон зимни нишасти хабарии ниҳодаш хабар дод.

Ӯ гуфт, “дар самти қонунвайронкуниҳо вобаста ба Қонуни Ҷумҳурии Тоҷикистон “Дар бораи масъулият барои таълиму тарбияи кӯдак”, аз ҷумла 138 ҳолати монеъ шудани волидайн ба гирифтани таҳсилоти ҳатмии умумии асосӣ ва 203 ҳолати додани таълимоти ғайриқонунии динӣ бо ҷалби 329 нафар, ки аз онҳо 177 нафарашон ноболиғ мебошанд, ошкор ва чораандешӣ гардид”.

Ҳамзамон, прокурори генералӣ зикр кард, ки дар самти қонунвайронкуниҳо вобаста ба Қонуни мазкур 3 ҳазор санад тартиб дода шуда, 2010 нафар ба ҷавобгарии маъмурӣ, 477 нафар ба ҷавобгарии интизомӣ ва 102 нафар ба ҷавобгарии моддӣ кашида шуда, дар ин самт 294 парвандаи ҷиноятӣ оғоз гардидааст.

Мавриди зикр аст, дар тағйироте, ки ахиран ба Кодекси ҳуқуқвайронкунии маъмурӣ ворид карда шуд, қисми 2-и моддаи 90-и кодекси мазкур муҷозоти як силсила қоидавайронкуниҳоро пешбинӣ карда, аз 15 то 20 нишондиҳанда барои ҳисобҳо ҷарима таъин намудааст.

Ҳоло 1 нишондиҳанда барои ҳисобҳо ба 72 сомонӣ баробар аст ва тибқи ин муқаррарот акнун волидони “кӯдакони ҳуқуқвайронкун” аз 1 ҳазору 80 то 1 ҳазору 440 сомонӣ ҷарима баста мешаванд.

Аммо агар давоми як соли баъди таъини ҷазои маъмурӣ такроран амалҳои мазкур содир шаванд, аз 2 ҳазору 160 то 2 ҳазору 520 сомонӣ ҷарима муайян шудааст.

Бояд гуфт, ки қаблан дар моддаи 90-и Кодекси ҳуқуқвайронкунии маъмурӣ чунин ҷазо пешбинӣ нагардида буд. Танҳо зикр мегардид, ки барои иҷро накардани ӯҳдадориҳои парасторӣ, тарбиявӣ, таълимӣ, ҳимояи ҳуқуқ ва манфиатҳои ноболиғон, истифода ё таҳдиди истифодаи зӯроварӣ сарпарастони кӯдакон ҳангоми набудани аломати ҷиноят огоҳӣ ё аз 3 то 8 нишондиҳанда барои ҳисобҳо (аз 216 то 576 сомонӣ) ҷарима баста мешаванд.