Худоёрзода Худоёр Завқибек, вазири нақлиёти кишвар 15 июл зимни нишасти матбуотӣ иброз намуд, ки дар соли 2020 барои нигоҳдорӣ ва таъмири роҳҳои автомобилгард аз буҷаи ҷумҳуриявӣ 70,5 млн. сомонӣ, аз ҷумла 31,9 млн сомонӣ барои музди меҳнат ва 38,6 млн. сомонӣ барои нигоҳдории роҳҳо пешбинӣ гардидааст.

Ба таъкиди номбурда, дар нимсолаи якуми соли ҷорӣ аз ҳисоби буҷети ҷумҳуриявӣ ба маблағи 28 млн. 407, 0 ҳазор сомонӣ ва аз буҷети мақомоти иҷроияи ҳокимияти давлатии шаҳру ноҳияҳо 6 млн. 508,8 ҳазор сомонӣ корҳои таъмиру нигоҳдорӣ иҷро гардидаанд, ки нисбат ба ҳамин давраи соли гузашта, буҷети ҷумҳуриявӣ 4,5% кам, буҷети маҳаллӣ қариб 2 маротиба зиёд мебошад.

Гуфта шуд, ки ғайр аз ин тибқи маълумотҳои ширкатҳою соҳибкорони ватанӣ ва аҳолӣ дар шаҳру ноҳияҳо ба маблағи 28 млн. 561,9 ҳазор сомонӣ корҳои таъмиру барқарорсозии роҳҳои автомобилгард ва иншооти он иҷро гардидаанд, ки нисбат ба ҳамин давраи соли гузашта 1,8 маротиба зиёд мебошад.