Дар Ҷумҳурии Тоҷикистон муҳоҷирати занон дар шаш моҳи аввали соли ҷорӣ коҳиш ёфта, дар ин давра 80 ҳазор зани муҳоҷир ба ватан баргаштаанд.

Ин нукта 5 август зимни нишасти хабарӣ аз ҷониби Бунафша Файзиддинзода, раиси Кумитаи кор бо занон ва оила зимни нишасти хабарӣ садо дод.

- Дар ин давра бозгашти занони муҳоҷир 80 ҳазору 519 нафар ба қайд гирифта шудаанд, ки ин нишондиҳанда нисбати соли 2023, 16 ҳазору 502 нафар зиёд аст, - иброз дошт ӯ.

Номбурда баён дошт, ки муҳоҷирати занон дар шаш моҳи аввали соли равон 78 ҳазору 573 нафарро ташкил медиҳад, ки нисбати соли 2023-юм 10 ҳазору 740 нафар кам мебошад.

Инчунин, дар нишаст зикр гардид, ки дар шаш моҳ ба мақомоти агентии кумита 39 ҳазору 281 зан барои кор муроҷиат кардаанд, ки гуфта мешавад, бештари онҳо аз муҳоҷирати меҳнатӣ баргаштаанд.

Фирӯза Нуруллозода, муовини аввали раиси Кумитаи кор бо занон ва оила гуфт, ки аз шумораи зикргардида ба 16 ҳазору 998 нафари он мақоми бекорӣ дода шудааст.

Дар нишаст зикр гардид, ки ин занҳо дар кишвар ба ҷойҳои кори мухталиф фаро гирифта шудаанд. Аз шумораи занони бекор 9823 нафар бо ҷойи кор таъмин гардидаанд.

Мавриди зикр аст, ки дар шаш моҳи аввали соли 2023 муҳоҷирати занон 89 ҳазору 493 нафарро ташкил медод. Инчунин бозгашти онҳо 64 ҳазору 17 нафар гуфта мешуд.