Аз тарафи олимони Академияи илмҳои кишвар дар шаш моҳи аввали соли ҷорӣ 10 патент ва 1 қарори мусбат оид ба додани патенти Ҷумҳурии Тоҷикистон барои ихтироот ба даст оварда шудааст. 

Дар ин бора Фарҳод Раҳимӣ, президенти Академияи илмҳои Ҷумҳурии Тоҷикистон, 29 июл, зимни нишасти хабарӣ ба хабарнигорон иттилоъ дода, инчунин афзуд: “Мо дар Академияи илмҳо Маркази омӯзиши технологияи инноватсионӣ таъсис додем, ки яке аз вазифаҳои марказ ҷалби бештари ихтироъкорони ҷавон ба корҳои илмӣ-тадқиқотӣ ва муҳайё намудани шароити мусоид барои ихтироъкорон мебошад, то онҳо тавонанд, ихтироот ва идеяе, ки доранд, биёянду дар ҳамин марказ амалӣ созанд. Дар як китоб то 100 патенти ихтироъкоронро ҷой кардем, ки ҳамаи он ихтирои наванд”. 

Дар идома зимни суханронӣ вобаста ба дастовардҳои илмии кормандони академия иброз гардид, ки аз ҷониби кормандони муассисаҳои илмии академия дар ин нимсола беш аз 668 кори илмӣ, аз ҷумла беш аз 50 китобу монография, маҷмуаҳои илмӣ, брошюра, 618 мақолаҳои илмӣ, аз онҳо 65 мақола дар маҷаллаҳои кишварҳои ИДМ ва давлатҳои хориҷи дур ба табъ расиданд.