27 октябр дар толори Донишгоҳи техникии Тоҷикистон ба номи академик М.С.Осимӣ ҳамоиши ҷавонони ҷумҳурӣ таҳти унвони “Нақши Иҷлосияи XVI Шурои Олии Ҷумҳурии Тоҷикистон дар рушди тафаккури насли ҷавони кишвар” баргузор гардид.

Ҳамоиши мазкур бо ибтикори Кумитаи иҷроияи ҲХДТ дар ноҳияи Шоҳмансур доир шуда, дар он Нилуфар Каримова, раиси Кумитаи иҷроияи ҲХДТ дар ноҳияи Шоҳмансур, Оятулло Аҳмадзода, раиси ташкилоти ҷамъиятии “Созандагони ватан” - и Кумитаи Марказии ҲХДТ, Ҷурабек Муродов, муовини раиси Кумитаи иҷроияи ҲХДТ дар шаҳри Душанбе, Адолат Раҳмонова, собиқадори ҳизбу меҳнат, Муҳаммад Ғоиб, Шоири халқии Тоҷикистон, Маликшо Неъматзода, раиси Федератсияи иттифоқҳои касабаи мустақили Тоҷикистон ва ҷавонони фаъоли ҷумҳурӣ ширкат варзиданд.

Баъд аз садо додани Суруди миллӣ барои иштирокчиёни ҳамоиш филм дар ҳаҷми 10 дақиқа бахшида ба Иҷлосияи XVI Шурои Олии Ҷумҳурии Тоҷикистон пешниҳод карда шуд.

Сипас, Нилуфар Каримова, раиси Кумитаи иҷроияи ҲХДТ дар ноҳияи Шоҳмансур суханронӣ намуда, иштирокчиёнро бахшида ба 30-солагии Иҷлосияи XVI Шурои Олии Ҷумҳурии Тоҷикистон муборакбод намуд. Ӯ афзуд: “16 ноябри соли 1992 дар шаҳри Хуҷанд Иҷлосияи XVI Шурои Олии Ҷумҳурии Тоҷикистон даъвати 12-ум баргузор гардид. Дар он вақт танҳо Шурои Олии Ҷумҳурии Тоҷикистон тамоми масъулиятро дар назди таърих, халқу ватан ва ҷомеаи ҷаҳонӣ бар дӯш гирифта, самти тараққиёти онро таҳти сарварии Президенти кишвар муҳтарам Эмомалӣ Раҳмон интихоб намуданд. Маҳз раиси тозаинтихоби Шурои Олӣ ва ҳамзамон Сарвари давлат барномаи мукаммали аз буҳрони сиёсӣ, иқтисодӣ, фарҳангӣ ва маънавӣ баровардани кишварро ба миён гузошт. Иҷлосияи мазкур собит сохт, ки мардуми Тоҷикистон дорои қувваи солим ва тавоноест, ки пеши ҳама гуна моҷароҷӯиро гирифта метавонад ”.

Иштирокчиёни дигар низ доир ба нақши Иҷлосияи XVI Шурои Олӣ дар рушди тафаккури насли ҷавони кишвар маърӯзаҳо намуданд.

Таҳмина ЮСУФӢ “ҶТ”