Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пас аз интихоб шудан ба вазифаи Раиси Шурои Олии Ҷумҳурии Тоҷикистон нахустин тадбирҳоро вобаста ба эътидол овардани миллати тоҷик ва шиносонидани он дар арсаи ҷаҳонӣ амалӣ намуданд.

Аз рӯзҳои аввали сари қудрат омадан Роҳбари давлат силсилатадбирҳоеро рӯи даст гирифтанд, ки баҳри баланд бардоштани шароити моддӣ ва маънавии ҷавонон дар кишвар равона гардида буд. Воқеан ҳам, дар ин замина нахустин вохӯрии Сарвари давлат бо табақаҳои гуногуни ҷомеа ба вуқуъ пайваст ва тамоми тадбирҳо бар он равона шуд, ки воқеан Тоҷикистон кишвари ҷавонӣ ва ҷавонон аст ва маҳз ҷавонон қодиранд, ки ояндаи дурахшони Тоҷикистонро шукуфо намоянд.

Дар заминаи сиёсати ҷавонпарваронаи Пешвои миллат нақши ҷавонон имрӯз дар таҳкими соҳибистиқлолӣ, таъмини асосҳои сохтори конститутсионӣ ва ҳарчи зудтар расидан ба ваҳдати миллӣ басо назаррас аст.

Соли 1992 Иттифоқи ҷавонони Тоҷикистон яке аз созмонҳои бонуфуз, ки иродаи ҷавононро ифода мекард ва нахустин созмони ҷамъиятии ҷавонон аст, таъсис ёфт. Ҷавонон тавонистанд дар тамоми соҳаҳо нақши арзандаи худро гузоранд ва соли 1994 дар маъракаи хеле муҳими сиёсӣ аз номи Иттифоқи ҷавонони Тоҷикистон муҳтарам Эмомалӣ Раҳмонро ба ҳайси номзад ба мансаби Президенти Ҷумҳурии Тоҷикистон пешбарӣ намоянд.

Соли 1997 як моҳ пеш аз ба имзо расидани Созишномаи истиқрори сулҳ ва ризоияти миллӣ мулоқоти навбатии Роҳбари давлат бо ҷавонон баргузор шуд ва қарор қабул гардид, ки 23 май минбаъд дар кишвар ҳамчун Рӯзи ҷавонони Тоҷикистон таҷлил карда мешавад. Ҳамзамон Роҳбари давлат ба Ҳукумати Ҷумҳурии Тоҷикистон дастур доданд, ки ба хотири татбиқи амалии сиёсати давлатии ҷавонон дар кишвар сохтори алоҳида ва махсус ваколатдор барои татбиқи сиёсати давлатии ҷавонон таъсис дода шавад. Дар асоси ин супориш соли 1998 Кумитаи кор бо ҷавонони назди Ҳукумати Ҷумҳурии Тоҷикистон таъсис ёфт. Бисёр муҳим аст, ки ҳар як ҷавон инро донад. Ин маънои онро дорад, ки роҳбарияти мамлакат ба хотири рушду пешрафт ва ояндаи дурахшони насли ҷавон шабу рӯз меҳнат мекунанду талош меварзанд.

Пас аз ин таъсиси Ҷоизаи ба номи Исмоили Сомонӣ ва дигар имкониятҳое, ки фароҳам оварда шуд, барои таъмини иштироки насли ҷавон дар рушди иқтисодиву иҷтимоии кишвар ва баланд бардоштани саҳми онҳо дар пешрафт ва шукуфоии Тоҷикистони азизамон муҳим буд. Пас аз ин соли 2017 дар кишвар аз ҷониби Пешвои миллат Соли ҷавонон эълон гардид. Ин як минбаре буд, ки ба насли ҷавон имконият дод, то худро дар тамоми соҳаҳо нишон диҳад, муаррифӣ кунад ва давлат барои дарёфти чеҳраҳои нав тамоми имконият ва шароитро муҳайё намуд.

Хушбахтона, мо ҳамасола 23 майро ҳамчун Рӯзи ҷавонони Тоҷикистон ҷашн мегирем ва он дар рӯйхати идҳо ва ҷашнҳои кишвар ворид карда шудааст. Ин рӯз ҳамчун як ҷашни ҷавонӣ ва ҷашне, ки зери таваҷҷуҳи Роҳбари давлат қарор дорад, таҷлил мегардад.

Аз ин хотир, фарзандону ҷавонони миллатро мебояд ҳамчун пайравони асили Пешвои миллат барои беҳтар шудани сатҳи зиндагии мардум ва рушди бемайлони кишвар аввало илм омӯзанд ва сониян ҳамчун мутахассиси варзида барои давлату миллат дар хизмат бошанд.


Ризо НАЗАРЗОДА, раиси шаҳри Хоруғ