Соли 2020 ҳаҷми истеҳсоли неруи барқ дар неругоҳҳои барқи обӣ ва марказҳои барқу гармидиҳии ШСХК “Барқи тоҷик” 15 млрд. 248 млн. кВт соатро ташкил дод, ки нисбат ба соли 2019 1 млрд. 215 млн. кВт соат кам мебошад. Ин нукта 17 феврал зимни нишасти матбуотии Ширкати “Барқи тоҷик” баён гардид.

Исмоилзода Мирзо Иброҳим, раиси Ширкати “Барқи тоҷик” сабаби кам гардидани истеҳсоли неруи барқро дар неругоҳҳои барқи обӣ ба маҳдуд гардидани захираҳои обӣ-энергетикӣ аз ҳисоби кам шудани маҷрои дарёи Вахш ва вобаста ба ин ғайриимкон гардидани ҳаҷми пешбинишудаи содироти неруи барқ ба хориҷи ҷумҳурӣ рабт дод.

Номбурда таъкид намуд, ки вобаста ба вазъи баамаломада, яъне кам шудани маҷрои дарёи Вахш ва паҳншавии бемории COVID-19 дар соли 2020 неруи барқ ба хориҷи мамлакат дар ҳаҷми 1 млрд. 536 млн кВт соат интиқол дода шуд, ки нисбат ба соли қаблӣ 1 млрд. 399 млн. кВт соат кам аст. Масалан, дар ин давра ба Афғонистон дар ҳаҷми 533 млн. кВт соат ва ба Ӯзбекистон дар ҳаҷми 851 млн. кВт соат неруи барқ кам содирот шуд.