Муноқиша ва ҷангу хунрезиҳо ҳанӯз аз давраҳои хеле қадим байни одамон рух дода, сабаби асосии онҳо маҳз ихтилофоти милливу нажодӣ, мазҳабӣ ё дигар ҳолатҳои ҳаммонанд аст. Феълан баъзе нафарони тиҳимағз ва иғвогару дур аз воқеият то ҳол дарк накардаанд, ки барангехтани кинаву адовати миллию нажодӣ дар ҷомеа тавассути интернет ё дигар воситаҳои хабаррасон паёмадҳои нангину фалокатборро ба бор оварда, як рафтори ноҷои онҳо метавонад, сабабгори зиддияти миллионҳо аҳолии кишвар шавад.

Чанде пеш филми ҳуҷҷатӣ вобаста ба ҳодисаҳои моҳи ноябри соли равон дар телевизиони маҳаллии “Бадахшон” ва шабакаҳои иҷтимоӣ пахш гардида, паҳлуҳои гуногуни авҷи ҳаводисро равшан намуд. Вале тоифае аз филм моҷароҷӯӣ карда, аллакай даф задаанд, ки гӯё “баъди пахши филм кадом гурӯҳе нақлиёти мусофирбари сокинони Вилояти Мухтори Кӯҳистони Бадахшонро дар минтақаи Кӯлоб манъ карда, ба бошандагони вилоят аз тарафи аҳли Кӯлоб осеб мерасад”.

Чунин аъмоли иғвогарона одатан на танҳо зидди шахсиятҳои бонуфуз равона мешавад, балки ҳадафи ниҳоӣ танҳо халалдор намудани суботу оромӣ, вайронсозии рукнҳои асосии давлатдорӣ ва таҳқири ҳокимияту халқ мебошад. Дар ин ҳолат, чӣ тавр чунин ҷиноятҳои нангин содир мегарданд, чандон муҳим нест.

Дар ин росто Манзаршо Диловаршоев, роҳбари ташкилоти "Манускрипт" гуфт: "Ба ҳеҷ ваҷҳ набояд ба барангехтани кинаву адовати миллӣ ё нажодӣ роҳ дод. Зеро мо аз чунин моҷарову кашмакашиҳои иғвоангезон ва бадхоҳони миллат сабақ гирифтаем. Онҳое, ки чунин саҳнасозиҳоро тарҳрезӣ мекунанд, бояд сари он биандешанд, ки бо кадом қимат истиқлоли Тоҷикистон ба даст омаду ҷанги таҳмилии шаҳрвандии кишвар хотима ёфт ва сулҳи деринтизорамон дар саросари ватан таъмин гашт. Бинобар ин, матбуоту шабакаҳои телевизионӣ ва иҷтимоиро мебояд, ки дар пойдории дӯстиву рафоқат боз ҳам нақши асосӣ гузошта, асолату дастовардҳои ваҳдат ва соҳибистиқлолиро воқеъбинона инъикос намоянд".
"Таҳдидҳои замони муосир бе ин ҳам ангуштшумор нестанд ва барангехтани адовати миллию нажодӣ тариқи интернет хатарноктар аз он аст, ки мо фикр дорем. Зеро аксарияти истифодабарандагони шабака наслҳои ояндасози мо мебошанд ва онҳо бояд дар рӯҳияи хештаншиносиву миллатдӯстӣ ба камол расанду набояд нисбати мардуми кишварашон ҳисси бадбинӣ дошта бошанд. Касоне, ки ба чунин аъмоли ғаразомезу иғвоангезона даст мезананд, бояд бидонанд, ки бо оташ бозӣ доранд. Зеро чунин саҳнасозиҳо як бор аз сари халқи Тоҷикистон гузаштанд ва агар Пешвои муаззами миллат муҳтарам Эмомалӣ Раҳмон роҳи ҳалли онҳоро намеёфт, нишон аз миллату давлатдории мо ҳам намемонд”, - иброз дошт Мамадарим Назиров, омӯзгори Донишгоҳи давлатии Хоруғ ба номи Моёншо Назаршоев.

Ҳамин тавр, ҳар ихтилофе, ки пеш меояд, бояд тариқи ақли солим ва маслиҳату музокирот ҳалли худро ёбад, то халқамон давоми асрҳо дар оромишу амонӣ ҳаёт ба сар барад.