Дар нимсолаи якуми соли 2019 аз ҷониби занон дар сатҳи ҷумҳурӣ 1200 ҷиноят содир гардидааст.

Идигул Қосимзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон ин нуктаро 1 август, зимни нишасти хабарӣ ба хабарнигорон баён намуда, дар шарҳи он гуфт: “Ҳолатҳои ҷиноятсодиркунӣ аз ҷониби занон ташвишовар буда, шумораи ҷиноятҳои содиргардида дар 6 моҳи аввали соли ҷорӣ нисбат ба ҳамин давраи соли гузашта 359 ҳолат зиёд аст”.  

Номбурда дар идома гуфт, таҳлили вазъ вобаста ба содиршавии ҷиноят нисбати занон дар давраи ҳисоботӣ 1957 ҳолатро ташкил намуда, он нисбат ба нимсолаи аввали соли 2018, 158 ҳолат бештар мебошад.

Дар ҷараёни нишаст аз ҳолатҳои даст ба худкушӣ задани бонувон изҳори нигаронӣ карда шуда, таъкид гардид, ки дар ин нимсола 150 ҳолати худкушӣ миёни бонувон ба қайд гирифта шудааст, ки он нисбат ба ҳамин давраи соли сипаригардида, 19 адад зиёд аст.