Ин суоле буд, ки 13 феврал зимни нишасти матбуотии Вазорати меҳнат, муҳоҷират ва шуғли аҳолии Ҷумҳурии Тоҷикистон аз ҷониби рӯзноманигорон баҳси гармеро ба миён овард.

Аз ҷумла, ба саволи ин ки “чаро баъд аз адои хизмати ҳарбӣ маблағи муайяншуда се маротиба ба шаҳрвандон пардохт намешавад?” гуфта шуд, ки маблағ дар асоси санадҳои муайяншуда ба нафароне дода мешавад, ки онҳоро вазорат бо ҷойи кори мувофиқ таъмин карда наметавонад.

- Мо шаҳрвандоне, ки хизмати ҳарбиро адо намудаанд, пеш аз ҳама бо ҷойи кор таъмин мекунем, агар касб надошта бошанд, онҳоро ба касбомӯзӣ ҷалб менамоем. Ғайр аз ин, мо онҳоро метавонем барои кор ба НБО-и “Роғун” сафарбар намоем. Лекин, дар баробари ин, маблағ низ пешбинӣ гардидааст, ки мо маблағ пардохт мекунем. Бисёр вақт як ё ду маротиба бо маблағ онҳоро таъмин мекунем, зеро аллакай онҳо ба кори доимӣ таъмин карда мешаванд, - гуфт Ашурзода Абдураҳмон, директори Агентии меҳнат ва шуғли аҳолӣ.

Ҳамчунин гуфта шуд, ки бештари вақт ба он хотир як маротиба маблағ пардохт карда мешавад, ки қисме аз онҳое, ки аз сафи Қувваҳои Мусаллаҳи Ҷумҳурии Тоҷикистон ба эҳтиёт рухсат мешаванд, маълумоти олӣ доранд ва дар ҷойҳои кории худ дубора ба кор шуруъ мекунанд.

Лозим ба зикр аст, ки дар соли 2022 ба маблағи 7151365 сомонӣ ба 11338 нафаре, ки аз сафи Қувваҳои Мусаллаҳи Ҷумҳурии Тоҷикистон ба эҳтиёт рухсат шудаанд, кӯмакпулӣ пардохт карда шудааст.