Чун анъана ВМКБ нақшаи даъвати тирамоҳии ҷавонписарон ба сафи Қувваҳои Мусаллаҳи Ҷумҳурии Тоҷикистонро аз аввалинҳо шуда, дар рӯзи аввал 101 фоиз иҷро намуд.

Чорабинии тантанавӣ бахшида ба гусели наваскарон 1 октябри соли 2026 бо баргузории роҳпаймоии оммавӣ дар маркази маъмурии Вилояти Мухтори Кӯҳистони Бадахшон – шаҳри Хоруғ оғоз гардид.

Дар роҳпаймоӣ роҳбарияти вилоят ва шаҳру ноҳияҳо, масъулини идораю муассисаҳо, сарбозон, кормандони сохторҳои қудратӣ, мақомотҳои ҳифзи ҳуқуқ, наваскарону волидони онҳо ва ҷавонони Бадахшон бо шиору овезаҳои ватандӯстона ва Парчами давлатӣ дар даст иштирок намуданд.

Пас аз роҳпаймоӣ дар боғи фарҳангию фароғатии шаҳри Хоруғ Чорбоғ, Сафарзода Шарифхон Нураҳмад, раиси вилоят ҳозиринро ба муносибати анҷоми маъракаи даъвати тирамоҳӣ табрику муборакбод намуда, зикр кард, ки Қувваҳои Мусаллаҳи Ҷумҳурии Тоҷикистон яке аз рукнҳои асосии давлатдорӣ, таҳкими истиқлолияту ваҳдати миллӣ, сулҳу субот ва омили пешрафту шукуфоӣ, созандагию бунёдкорӣ ба ҳисоб меравад. Маҳз бо дастур ва роҳнамоиҳои Пешвои хирадманди миллат, Сарфармондеҳи Олии Қувваҳои Мусаллаҳи кишвар муҳтарам Эмомалӣ Раҳмон заминаҳои асосии таъсиси Қувваҳои Мусаллаҳ гузошта шуда, иқтидори мудофиавии ин неруи бузургу боэътимод тадриҷан қавъӣ гардид.

Гуфта шуд, ки ифтихорманду сарфароз аз онем, ки имрӯз аксарияти ҷавононамон ба хизмати ҳарбӣ ба таври ихтиёрӣ сафарбар шуда, ҳатто яккаписарон ҳам ба комиссариятҳои ҳарбӣ ба таври ихтиёрӣ ҳозир шуда, бо ин васила, омодагии хешро барои хизмати Модар –Ватан зоҳир менамоянд.

Дар идома, даъватшудагон ва волидайни онҳо баромад намуданд.

Сипас, аҳли фарҳанги вилоят барномаи пуршукӯҳи рақсию мусиқиро манзури ҳозирин гардонида, даъватшудагон зери шиори “Мо ба Ватан содиқона хизмат мекунем” ба хизмати ҳарбӣ гусел карда шуданд.

Кишвари АМИРШО, “ҶТ”