1 октябр дар асоси Фармони Президенти Ҷумҳурии Тоҷикистон дар мамлакат даъвати тирамоҳии ҷавонон ба сафи Қувваҳои Мусаллаҳ оғоз гардида, ҷавонони худогоҳу хештаншиноси деҳоти Ворух бо амри дилу виҷдон ба хидмати Модар-Ватан рафтанд.

Дар рӯзи нахустин деҳоти Ворух нақшаи даъватро 100 фоиз иҷро намуд. Ин дастовард аз ҳисси баланди ватандӯстӣ ва ифтихори миллӣ, худогоҳиву хештаншиносӣ ва нишонаи татбиқи сиёсати оқилона ва дурандешонаи Пешвои миллат муҳтарам Эмомалӣ Раҳмон дар деҳоти Ворух далолат медиҳад.

Дар ҷамоати деҳоти Ворухи шаҳри Исфара ба муносибати гусели наваскарон чорабинии идона доир гардид. Диловарони ворухӣ бо сарбаландӣ ва ифтихор аз ватандорӣ дар назди волидон ва ҳамдеҳагони худ паҳлу ба паҳлу саф кашида, бо ин иқдоми ҷавонмардона нишон доданд, ки ба давлату миллати худ содиқ ҳастанд.

Хизмат дар сафи Артиши миллиро ҷавонони ватнадӯст гузаштан аз мактаби мардонагӣ унвон намуда, бо ифтихори зиёд изҳор доштанд, ки дар ҳимояи марзу буми меҳани хеш ҳамеша дар сафи пеш қарор мегиранд.

Собиқадорони ҷангу меҳнат ва дар умум хурду бузурги ин гӯшаи диёри биҳиштосо ҳамроҳи наваскарон то дергоҳ суруру шодмонӣ намуданд. Муҳофизони Ватан, ки имрӯз бо амри дилу виҷдон ба хидмати ҳарбӣ мераванд, намунаи ибрати насли наврас буда, сарчашмаи ифтихору сарбаландии падарону модарони хешанд.

Чорабинии гусели наваскарон дар деҳоти Ворух ва Чоркуҳи шаҳри Исфара бо риояи тамоми анъанаҳои дерин баргузор гардид. Барномаи рангини фарҳангӣ ба ин чорабинӣ шукӯҳу шаҳомати хосса бахшид. Диловарони ватан бо руҳияи баланд ба хизмати ҳарбӣ гусел карда шуданд.

С. ҚОДИРОВ, “ҶТ”