Имрӯз Давлаталӣ Саид, раиси вилояти Хатлон дар шаҳри Бохтар бо корҳои созандагию бунёдкорӣ дар маҳаллаи Хатлон дар ростои Ҷашни 35-солагии Истиқлоли давлатӣ шинос шуд.

Дар ин бора Хадамоти матбуоти раиси вилояти мазкур иттилоъ медиҳад.

Тибқи иттилои манбаъ, корҳои созандагию бунёдкорӣ дар доираи дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва нақша-чорабиниҳои мақомоти иҷроияи ҳокимияти давлатии вилоят роҳандозӣ гардидааст.

Раиси вилоят нахуст пас аз таъмиру азнавсозии дарвозаи даромадгоҳи маҳаллаи Хатлон, роҳравҳо, кӯчаҳои маҳалла дидан кард. Ҳамзамон дар муаррифии лоиҳаҳои бунёди бинои баландошёнаи истиқоматӣ барои оилаҳои кормандони ҳифзи ҳуқуқ, соҳаи маорифу тандурустӣ, ниёзманд ва толори варзишии замонавӣ барои сокинони маҳалла иштирок намуда, санги асос гузошт.

Гуфта мешавад, ки бинои истиқоматӣ дар муддати 1 сол ва толори варзишӣ дар муддаи 6 моҳ сохта ба истифода дода мешавад.
Раиси вилоят аз иқдоми пешгирифтаи соҳибкорон истиқбол намуда, ин амалро шоистаи таҳсин хонд.

Инчунин, бо ташаббуси соҳибкорон таъмиру азнавсозии як қатор иншоот ба нақша гирифта шудааст.

Раиси вилоят бо сокинони маҳалла суҳбат намуда, таъкид кард, ки кӯчаву маҳаллаҳоро тоза нигоҳ дошта, фарҳанги шаҳрнишиниро риоя намоянд.