Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон дар нимсолаи аввали соли ҷорӣ дар корхонаву иншоотҳо 30 ҳодисаи нохушро ба қайд гирифтааст, ки дар натиҷа 26 нафар ҳалок шудаанд. 

Дар ин бора 27 июл Раҳим Санъат, сардори хадамот зимни нишасти матбуотии ниҳодаш иттилоъ дод.

- Дар ин ҳодисаҳои нохуш 26 нафар ҷароҳатҳои гуногуни ҷисмонӣ бардоштанд. Сабабҳои асосии ҳодисаҳои нохуш ин бемасъулиятии муҳандисони техникии корхонаҳо дар ҷойи ҳодиса, беаҳамиятии ҷабрдидагон ҳангоми кор бо иншооти хатарнок, риоя нагардидани қоидаҳои бехатарии саноатӣ дар рафти кор бо иншооти истеҳсолии хатарнок, риоя нагардидани технологияи коркарди кон, ҳамчунин надоштани мутахассисони соҳавӣ мебошад, - иброз дошт номбурда.

Ҳамзамон гуфта шуд, ки барои роҳ додан ба камбудиҳо нисбати 5 нафар шахсони мансабдор ҷавобгарии ҷиноӣ татбиқ карда шуда, инчунин нисбати 7 шахси ҳуқуқӣ, 27 шахси мансабдор ва 2 шахси воқеӣ аз тарафи комиссияҳои тафтишотӣ ҷазои маъмурӣ татбиқ гардида, ҷаримабандӣ шуданд. Маблағи умуми ҷаримабандӣ 182 ҳазору 240 сомониро ташкил додааст.