Дар Ҷумҳурии Тоҷикистон дар шаш моҳи аввали соли равон 4408 нафар оилаҳо аз ҳам ҷудо шудаанд, ки нисбати ҳамин давраи соли гузашта ин шумора 962 ҳолат кам аст.

Дар ин бора Бунафша Файзиддинзода, раиси Кумитаи кор бо занон ва оилаи нахди Ҳукумати Ҷумҳурии Тоҷикистон 5 август зимни нишасти хабарӣ бо рӯзноманигорон иттилоъ дод.

Номбурда зикр кард, ки дар шаш моҳи соли равон дар кишвар 30 ҳазору 434 ҳолати ақди никоҳ ба қайд гирифта шудааст, ки нисбати ҳамин давраи соли гузашта 2417 ҳолат кам аст.

Раиси кумита аз никоҳи хешутаборӣ дар кишвар изҳори нигаронӣ карда гуфт, ки бояд садди роҳи чунин ҳолатҳо гирифта шавад.
Инчунин, шумораи кӯдакони ноболиғи дар тарбияи яке волидон қарордошта 4034 нафарро ташкил медиҳанд, ки нисбати ҳамин давраи соли гузашта 1439 нафар кам аст. Ин шумора соли гузашта 5473 нафарро ташкил медод.

Ҳамзамон, дар ин давра сӯиқасд ба ҷони худ дар ҷумҳурӣ аз ҷониби занон 110 ва аз ҷониби ноболиғон 24 ҳолат ба қайд гирифта шудааст.