Моҳи марти соли 2022 дар шаҳри Тошканди Ҷумҳурии Ӯзбекистон Форуми ҷавонони Осиёи Марказӣ доир мегардад. Дар ин бора 26-уми декабр зимни вохӯрии муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Дилноза Аҳмадзода бо муовини директори Агентии кор бо ҷавонони Ҷумҳурии Ӯзбекистон Дилноза Каттахонова дар шаҳри Тошканд иттилоъ дода шуд.

Вохӯрии мазкур дар ҳошияи баргузории Форуми ҷумҳуриявии ҷавонони Ӯзбекистон – 2021 доир шуда, дар кори он ҳайати Тоҷикистон бо иштироки масъулини Кумитаи кор бо ҷавонон ва варзиш ва Иттифоқи ҷавонони Тоҷикистон ширкат варзиданд.

Дар вохӯрии мазкур ҷонибҳо вобаста ба тақвияти фаъолият дар самти ҷавонон ва ҳадафмандии форуми мазкур ибрози назар намуда, ҳамзамон доир ба табодули таҷриба ва амалигардонии роҳҳои нави татбиқи сиёсати давлатии ҷавонон суҳбати самимӣ анҷом доданд.            

Гуфта шуд, ки ба имзо расонидани Созишномаи ҳамкорӣ миёни Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Агентии кор бо ҷавонони Ҷумҳурии Ӯзбекистон дар самти кор бо ҷавонон ба манфиати кор мебошад.

Амони МУҲАММАД, коромӯзи “ҶТ”